\"NATO PA-da Azərbaycan əleyhinə sənədin qəbuluna imkan verilmədi\"
Bunu “Ölkə.Az”a açıqlamasında Azəbaycanın NATO Parlament Asssambleyasındakı nümayənəd heyətinin üzvü Məlahət İbrahimqızı deyib.
Onun sözlərinə görə, elə NATO PA-nın sessiyası öz işini başlayan kimi ilk müzakirə olunan məsələ Türkiyənin Suriya ərazisində həyata keçirdiyi hərbi əməliyyatlar oldu.
“Ancaq prosedura görə, əvvəlcə gündəlikdə olan məsələlər müzakirə olunmalı, daha sonra buna müvafiq olaraq sənədlər qəbul edilməli idi. Bu dəfə hər şey əksinə olaraq əvvəlcə yekun qətnaməsinin qəbul edilməsi ilə bağlı hesabat müzakirə edildi. Sessiyada komitə iclasında müzakirəyə təqdim edilən elə ilk hesabatda Azərbaycanla bağlı bəzi qərəzli yanaşmaların olduğunun şahidi olduq. Təbii ki, mən Azərbaycan nümayəndə heyətinin üzvü olaraq bir neçə dəfə söz alaraq çıxış etdim və bu cürə qərəzli yanaşmaların və əsası olmayan “faktların” Qətnamə layihəsinə salınmasının yolverilməz olduğunu bildirdim. Mənim çıxışım və təkliflərim komitənin iclasında iştirak edənlər və məruzəçi tərəfindən nəzərə alındı. Qeyd etdiyim kimi, hesabatdakı əsassız “faktlar” Qətnamə layihəsinə salınmadan komitə iclasında səsvermə yolu ilə qəbul olundu və təsdiq üçün plenar iclasa tövsiyə olundu. Komitə iclasında bu layihə çox ətraflı müzakirə olunduğu üçün plenar iclasda müzakirə çox uzun olmadı və qəbul olundu. Beləliklə Azərbaycana qarşı növbəti ədalətsiz və ikili standartın qarşısı alındı müzakirə olundu”, - deyə deputat qeyd edib.
M.İbrahimqızı əlavə edib ki, Türkiyənin həyata keçiridyi “Barış Pinarı” əməliyyatı da müzakirə edildi. “NATO-nun nizamnaməsinı uyğun olaraq üzv ölkənin biri hər hansı təhlükə ilə üzləşirsə digər üzv ölkələr də ona dəstək verməlidir. Amma çox təəssüf. Biz bunun tam əks bir mənzərənin şahidi oluruq. Əlbəttə belə müzakirələrdə hər zaman Türkiyənin yanındaydıq. Təsəvvür edin ki, müzakirələrdə bəzi çıxış edənlər Türkiyə tərəfindən həyata keçirilən əməliyyata hətta işğal əməliyyatı adı verməyə çalışırdılar. Bax, bu qədər ədalətsiz bir yanaşma mövcud idi. NATO-nun əsas ölkələrindən olan qardaş Türkiyənin indi öz ölkəsini, ərazi bütövlüyünü, əhalisini, dövlət təhlükəsizliyini müdafiə etdiyi bir məqamda özü üzv olduğu təşkilat tərəfindən ikili standartlarla üzləşirdi. Əlbəttə bu müzakirələrdə həm Qüdrət Həsənquliyev, həm də mən çıxış edərək, qardaş Türkiyənin haqlı olduğunu və onun haqq işini müdafiə etdik. Bilirsiz son illər beynəlxalq təşkilatlar açıq aşkar riyakarlıq edirlər. Bu müzakirələr zamanı Türkiyə əleyhinə aparılan təbliğata qarşı öz sərt mövqeyimizi ortaya qoyduq. Türkiyənin həm öz milli qanunvericilikləri və həm də beynəlxaq qanunvericilik çərçivəsində, xüsusilə də BMT və Avropa strukturlarının qəbul etdikləri rəsmi hüquqi sənədlərə görə tam haqlı olduğunu xatırlatdıq. Mən çıxışımda qeyd etdim ki, Azərbaycan da uzun illərdir ki, işğaldan və erməni terrorundan əziyyət çəkir. 30 ilə yaxındır ki, torpaqlarımızın iyirmi faizi işğal olunub, bir milyondan çox vətəndaşımız qaçqındır. Bütün beynəlxalq təşkilatlar susqunluq nümayiş etdirir. BMT və Avropa strukturları Ermənistanı işğalçı kimi tanıyan sənədlər qəbul etsə də, ölkəmizə olan ikili standartlara görə işğal hələ də davam edir. Çıxışımın sonunda ümid etdiyimi bildirdim ki, NATO PA növbəti bir iclasında da Ermənistanın işğalçılıq siyasətini pisləyəcək müzakirələrin keçiriləcəyinə və işğalçıya Azərbaycan torpaqlarını tərk edin deyəcəklərinin şahidi olacağıq”, - deyə deputat bildirib.
M.İbrahimqızı onu da bildirib ki, son illər Prezident İlham Əliyev də beynəlxalq təşkilatların məsuliyyətsizliyini, ikili standartlarla yanaşmasını çox ciddi və qətiyyətlə tənqid edir: “Bildiyimiz kimi bu yaxınlarda Soçidə “Valday” klubunun iclasında da bu fikirləri səsləndirdi.
BMT Təhlükəsizlik Şurası erməni silahlı qüvvələrinin işğal olunmuş ərazilərdən dərhal və qeyd-şərtsiz çıxarılmasını tələb edən dörd qətnamə qəbul edib. İyirmi beş ildən çoxdur ki, bu qətnamələr yerinə yetirilmir.
BMT Təhlükəsizlik Şurası ali beynəlxalq orqan olduğu halda 25 ildən çox müddətdə onun qəbul etdiyi qərarlar yerinə yetirilmirsə, onda bu, həmin təşkilatın səmərəliliyi haqqında necə danışa bilərik. Beynəlxalq təşkilatlar bəzən bu qətnamələri bir neçə gün ərzində yerinə yetirirlər ona görə də müəyyən hərbi əməliyyatların həyata keçirilməsinə heç ehtiyac da qalmır. Çox təəssüf ki, Qarabağın işğalı ilə bağlı məsələdə isə qətnamələr kağız üzərində qalır. Ancaq Dağlıq Qarabağ münaqişəsi Azərbaycanın ərazi bütövlüyü çərçivəsində, BMT-nin bütün dünya tərəfindən qəbul edilmiş Nizamnaməsi, BMT Təhlükəsizlik Şurasının qəbul etdiyi qətnamələr və Helsinki Yekun Aktı çərçivəsində həll olunmalıdır”.
Mürtəza
Ölkə.Az
