Mətn ölçüsü:
  • 100%

“Prezident və Birinci vitse-prezident bir vətəndaş olaraq cəmiyyətə nümunə oldular”

Koronavirus pandemiyası ilə mübarizə Azərbaycan Prezidenti cənab İlham Əliyev və Birinci vitse-prezidenti Mehriban xanım Əliyevanın yürütdüyü siyasətin ana xəttini ölkə vətəndaşının təhlükəsizliyi və sağlamlığının müdafiəsi, dövlətin və xalqın milli maraqları təşkil etdiyinin bariz göstəricisidir.

Bunu “Ölkə.Az” a açıqlamasında millət vəkili Əliabbas Salahzadə deyib.

Onun sözlərinə görə, bir sıra ölkə rəhbərlərinin koronavirus epidemiyasının yayıldığı ilk zamanlarda səhlənkarlıq etməsi acı nəticələrə səbəb oldu və biz bunu müxtəlif ölkələrin timsalına müşahidə etməkdəyik.

“Ancaq Azərbaycan Prezidentinin uzaqgörənliyi nəticəsində ölkəmizdə zamanında bu epidemyanın yayılmasının qarşısının alınması məqsədi ilə ciddi tədbirlər planı hazırlanaraq bu istiqamətdə real işlər həyata keçirildi. İlk olaraq epidemiyanın ölkəmizdə geniş yayılmasının qarşısını almaq məqsədi ilə Nazirlər Kabineti yanında Operativ Qərargah yaradıldı və həmin Qərargah tədbirlər planı hazırlayaraq həyata keçirməyə başladı. Ölkə başçısı daha ciddi addımlar atmaqla ölkəmizi bütün dünyada koronavirus pandemiyasına qarşı effektiv mübarizə aparan nümunə bir dövlətə çevirdi. Cənab Prezident İlham Əliyev həm koronavirus pandemiyasına, həm də pandemiya nəticəsində ölkə iqtisadiyyatına, sahibkarlara təsirləri minimuma endirmək və onlara dəstək vermək, eyni zamanda  sosial müdafiəyə ehtiyacı olan insanların sosial müdafiəsini təmin etmək məqsədi ilə büdcədən 1 milyard manat vəsaitin ayrılması barədə Sərəncam imzaladı. Bunun ardınca Koronvirusla Mübarizəyə Dəstək Fondu yaradıldı. Azərbaycan Prezidenti və Birinci vitse-prezident təkcə  vəzifələrindən irəli gələn missiyanı layiqincə yerinə yetirməklə kifayətlənmədilər, o cümlədən bir vətəndaş kimi cəmiyyətə nümunə olaraq bir illik əməkhaqqlarını Fonda ianə etdilər. Azərbaycan cəmiyyəti Prezident və Birinci vitse-prezidentin bu addımını təqdir etdi və özləri də bu prosesdə aktiv iştirakçıya çevrildi. Məhz bunun nəticəsi olaraq qısa zaman ərzində Koronavirusla Mübarizəyə Dəstək Fonduna 90 milyona yaxın vəsait toplandı. Prezident və Birinci vitse-prezidentin ciddi cəhdləri nəticəsində pandemiya ölkəmizdə nəzarətə götürülüb. Bu prosesdə Prezident, Birinci vitse-prezidentlə yanaşı, Heydər Əliyev Fondunun birinci vitse-prezidenti Leyla xanım Əliyeva da aktiv iştirak etməkdədir. Ölkə rəhbərliyi xaricdə yaşayan, işləyən vətəndaşlarımız və soydaşlarımızın da taleyinə biganə qalmayaraq, onların təhlükəsizliyini və sağlamlığını təmin etmək məqsədi ilə ölkəmizə təxliyyəsi istiqamətində ciddi işlər gördü və görülməkdədir. Gələn vətəndaşları karantinə yerləşdirmək üçün respublikanın müxtəlif bölgələrində xüsusi xəstəxanalar ayrılaraq karantin mərkəzləri yaradıldı. Pandemiyaya qarşı mübarizə istiqamətində ciddi tədbrilər planı bu gün də davam etməkdədir.  Bu məqsədlə martın 29-dan etibarən ölkə ərazisində ciddi karantin rejimi tətbiq olunub və həyata keçirilməkdədir. Yəni dövlət üzərinə düşən missiyanın öhdəsindən layiqincə gəlmək üçün nə lazımdırsa, onu edir və etməkdədir”- millət vəkili vurğulayıb.

Ə. Salahzadə əlavə edib ki,  görülən işlər bununla bitmir: “Prezident İlham Əliyev və Birinci xanım Mehriban Əliyeva tərəfindən martın 28-də Bakıda “Yeni Klinika” tibb müəssisəsinin tikilərək tam təchizatla istifadəyə verilməsi koronavirusla mübarizəyə bir töhfədir. Bu tibb müəssisəsinin koronavirusa yoluxmuş xəstələrin müalicəsi üçün istifadə olunması bir daha dövlətimizin öz vətəndaşlarının səhhəti və sağlamlığına nə qədər diqqət göstərdiyinin  göstəricisidir.
İndiyədək respublikanın müxtəlif regionların diaqnostika mərkəzlərinin, şəhər xəstəxanalarının tikilib əhalinin xidmətinə verilməsi koronovirus pandemiyasına qarşı ölkəmizin effektiv mübarizə aparmasına geniş imkanlar yaradır. Bu da bir daha ölkə rəhbərliyinin Azərbaycan vətəndaşının maraqları keşiyində dayandığının bariz nümunəsidir”.

Deputat eyni zamanda pandemiya ilə mübarizədə ön cərgədə olan və bu işə öz töhfəsini verən həkimlərimizin də fədakarlğını təqdir edərək, onların belə bir məqamda ağır məsuliyyətin altına girdiklərini və bu missiyanın öhdəsindən layiqincə gəldiklərini çox cəsarətli addım və insanlıq nümunəsi kimi dəyərləndirib: “Hazırkı çətin dövrdə də Azərbaycan həkimləri koronavirusa qarşı mübarizədə öndə olmaqla böyük fədakarlıq nümunəsi göstərirlər. Belə vəziyyətdə hər bir Azərbaycan vətəndaşı ümummilli təhlükəsizliyimizi təhdid edən koronavirus bəlasına qarşı yalnız milli birlik və həmrəylik nümayiş etdirməklə səmərəli mübarizə apara bilər. Ona görə də vətəndaşlıq məsuliyyəti bu gün hər zamankından daha aktual olmaqla, həm sıravi vətəndaşlarımızın, həm bütövlükdə cəmiyyətimizin, həm də həkimlərimizin və tibb işçilərimizin təhlükəsizliyinin qorunmasına xidmət etməlidir”.

Deputat son olaraq vətəndaşları da tətbiq edilən karantin rejiminin tələblərinə ciddi əməl etməyə səsləyib: “Biz yalnız bir olub, həmrəylik nümayiş etdirib,  cəmiyyət qarşısındakı vətəndaş məsuliyyətimizi dərk edərək qaydalara ciddi əməl etməklə dünyanı ağuşuna alan bu bəladan minimum itki ilə çıxa bilərik. Gəlin gələcəyimiz naminə vətəndaş məsuliyyətimizi dərk edib, karantin rejimi ilə əlaqədar olaraq tətbiq edilən qaydalara ciddi riayət edək. Bu qaydalar başqasının deyil, ilk növbədə özümüzün təhlükəsizliyimiz və sağlamlığımız üçün lazımdır”.

Mürtəza 
Ölkə.Az