“Prezidentin Davos Forumunda iştirakı milli maraqlarımızın təmin olunmasına xidmət edir”
Bunu “Ölkə.Az” açıqlamasında politoloq Elxan Şahinoğlu deyib.
Onun sözlərinə görə, Azərbaycan Prezidentinin Davos Forumu çərçivəsində müxtəlif ölkə və dünya səviyyəli şirkətlərin rəhbərləri ilə görüşləri, panellərdə çıxışları hər baxımdan ölkəmizin xeyrinədir. “Bu görüşlər, çıxışlar, eyni zamanda Dağlı Qarabağ münaqişəsi barədə dünya ictimaiyyətinin məlumatlandırılması baxımından faydalıdır”- politoloq qeyd edib.
O əlavə edib ki, Azərbaycan Prezidenti panellərdə ona verilən sualları cavablandırarkən, bir daha onun yürütdüyü siyasətdə milli maraqlarımızın hər şeydən öndə olduğuna şahidlik etdik. “Dövlət başçısı bir daha sübut etdi ki, Azərbaycan milli və təhlükəsizlik maraqlarına uyğun şəkildə xarici siyasətini yürüdür. Bu gün Azərbaycan işğalçılıq siyasətinə görə Ermənistandan başqa dünyanın bütün ölkələri ilə münasibətlərin qarşılıqlı faydalılıq formasında qurulmasında maraqlıdır. Azərbaycanın hazırda dünyanın əksər ölkələri ilə çox sıx əlaqələri var. Bu əlaqələr Azərbaycanın milli və təhlükəsizlik maraqları əsasında qurulub. Bir daha deyirəm ki, bu əlaqələr iqtisadi səmərələlik və qarşılıqlı faydalılığa söykənir. Ona görə də Azərbaycan bölgədə sabitliyin bərpasında maraqlıdır. Çünki müharibələr, qarşıdurmalar təkcə bölgə dövlətlərinə deyil, bütün dünyaya mənfi təsir edir. Prezident İlham Əliyev Davosdakı çıxışları ilə bir daha aydın surətdə dünyaya mesaj ünvanlayır ki, Azərbaycan bölgədə sülhün, sabitliyin, təhlükəsizliyin yaranmasında maraqlıdır”- poitoloq bildirib.
Mürtəza
Ölkə.Az