KORONAVİRUSA YOLUXANLARIN SAYI - CANLI STATİSTİKA

“Rosneft”in rəhbəri: “Neftin qiyməti bu ilin sonuna qədər 60 dollara çata bilər”

“Rosneft”in rəhbəri: “Neftin qiyməti bu ilin sonuna qədər 60 dollara çata bilər”
13:55
21.03.2020
1785
İqtisadiyyat
A
“Dünya neft bazarında yaranmış vəziyyət ABŞ-ın şist neft istehsalçılarını tədricən müflis edəcək. Bunun nəticəsində bazarda yenidən tarazlıq yarana və neftin 1 barelinin qiyməti bu ilin sonuna qədər 60 ABŞ dollarına çata bilər”.

“Report” xarici mətbuata istinadən xəbər verir ki, bunu Rusiyanın dövlət neft şirkəti - “Rosneft”in rəhbəri İqor Seçin bildirib.

O, “qara qızıl”ın hazırki qiymətlərini “dramatik” adlandırıb və deyib: “Bu vəziyyətdə investorlar şist neft istehsalına maraq göstərərmi? Mən buna inanmıram”. 

Ölkə.Az

ŞƏRH YAZ
0

İdxal olunan benzinin qiymətinin artması ölkənin yanacaq balansına təsir etməyəcək — TƏHLİL

İdxal olunan benzinin qiymətinin artması ölkənin yanacaq balansına təsir etməyəcək
18:56
01.07.2020
993
İqtisadiyyat
A
Bu ilin mart ayında dünyada neft qiymətlərinin aşağı düşməsi, həmçinin koronavirus pandemiyası şəraitində tətbiq olunan fərdi nəqliyyat vasitələrinin hərəkətini məhdudlaşdırmaq tədbirləri bir sıra ölkələrdə pərakəndə benzin qiymətlərinin görünməmiş dərəcədə ucuzlaşmasına səbəb oldu. Bu proseslər Azərbaycanın yanacaq bazarına da təsir etdi; idxal olunan yüksək oktanlı benzinin qiymətləri mart və may aylarında ucuzlaşdı. Lakin iyun ayının sonunda bazar konyunkturasında dəyişiklik dünya miqyasında yanacaq qiymətlərinin artmasına səbəb oldu, bu da təbii olaraq Azərbaycana idxal olunan “Premium Euro-95”in pərakəndə satış qiymətlərinə təsir etdi.

Anlamaq lazımdır ki, son illərdə Azərbaycan Dövlət Neft Şirkətinə (SOCAR) məxsus olan Heydər Əliyev adına Bakı Neft Emalı Zavodu (BNEZ) yalnız bir markalı avtomobil benzini - “AI-92”  istehsal edir. Bu növ yanacağın qiymətləri Azərbaycan Nazirlər Kabineti yanında Tarif Şurasının qərarları ilə tənzimlənir və bazar tələbindən, yaxud qlobal trendlərin dəyişməsindən asılı olmayaraq, ölkənin bütün yanacaqdoldurma məntəqələrində dəyişməz olaraq qalır.

Ölkədə istehlak edilən bütün növ avtomobil yanacağının 97 faizini “AI-92” markasının təşkil etdiyini və hökumətin tarif siyasətinin iqtisadi dəstək mülahizələrinə və yanacaq balansının məharətli korrektəsinə əsaslandığını nəzərə alsaq, benzin qiymətlərinin dövlət tənzimlənməsi özünü doğruldur.

Əvvəllər BNEZ “AI-80” və “AI-93” markalı benzin istehsal edirdi. Ancaq sonradan istehsal proseslərini optimallaşdırmaq məqsədiylə onun istehsalı dayandırıldı. Altı il əvvəl hökumət yüksək oktanlı yanacaq bazarında qiymətləndirmənin liberallaşdırılmasına qərar verdi və 2014-cü il aprelin 1-dən Azərbaycana “Premium Euro-95” və “Super Euro-98” markalı benzin idxal edildi. Bu seqmentdə qiymətləndirmə bazarla diktə edilir və yanacaqdoldurma məntəqələrində pərakəndə satış qiymətləri dünyada mövcud bazar qiymətlərindən asılı olaraq vaxtaşırı dəyişir.

Bu yaxınlara qədər Azərbaycanda “95” və “98” markalı benzinin bir litrinin qiyməti müvafiq olaraq 1,5 və 1,6 manat səviyyəsində saxlanılırdı. Ancaq mart ayında dünya birjalarında neft qiymətlərinin görünməmiş  şəkildə çökməsindən və avtomobil yanacağının alış qiymətlərinin kəskin azalmasından sonra Azərbaycanın idxal şirkətləri də qiymətləri aşağı saldılar. Belə ki, mart ayında “Super Avro-98”nun bir litri 1,4 manata, “Premium Euro-95”-nun qiymətləri isə iki dəfə - martın 13-də 1,2 manata, mayın 1-də 1,1 manata düşdü.

Lakin son bir ayda neft qiymətlərinin müşahidə olunan sabitləşməsi, ən əsası isə Avropa, MDB ölkələri və dünyanın bir sıra digər bölgələrində nəqliyyat vasitələrinin hərəkətinə karantin məhdudiyyətlərinin aradan qaldırılması qlobal yanacaq bazarının dinamikasına müsbət təsir göstərib. Benzin istehlakının artması birja kotirovkalarına təsirsiz ötüşməyib, müvafiq olaraq, Azərbaycana yüksək oktanlı yanacaq tədarük edən təchizatçı kontragentlərin qiymətləri artıb. Bu proseslər son günlər qonşu ölkələrdə, xüsusən Rusiyada çox açıq şəkildə özünü göstərir, hansı ki, burada “AI-95” markalı benzinin qiyməti ardıcıl üçüncü gündür birja ticarətində rekordu təzələyir. Rusiya bazarındakı qiymət səviyyəsi ölkəmiz üçün çox kritikdir, çünki yüksək oktanlı yanacağın əsas payı məhz Rusiya Federasiyasından gəlir. Belə ki, 2020-ci ilin yanvar-aprel aylarında Azərbaycana gətirilən 22 min ton “Premium Euro-95” markalı benzinin 97,6 faizi Rusiyanın neft emalı zavodlarının payına düşür.

Beləliklə, bazar şəraitindəki dəyişiklik “Aİ-95” premium markalı benzinin qiymətində qaçılmaz artım yaratdı və iyulun 1-dən etibarən bu növ yanacağın litri 1,2 AZN-ə satılır. “Super Euro-98” markalı yanacağın qiymətində isə dəyişiklik olmayıb. Bununla belə, “Aİ-95” markalı benzinin pərakəndə satış qiymətlərində bir qədər artım olsa da, Azərbaycandakı pərakəndə satış tarifləri Ukrayna, Türkiyə, Şərqi və Qərbi Avropanın əksər ölkələrinə nisbətən nəzərəçarpacaq dərəcədə aşağıdır.

Yanacaq balansında yüksək oktanlı növlərin əhəmiyyətsiz payını nəzərə alaraq, idxal edilən benzinin qiymətlərinin artması, Azərbaycanda yanacağın ümumi qiymət səviyyəsinə təsir göstərməyəcək.

Bu fakt da çox önəmlidir ki, idxal edilən yüksək oktanlı benzin növləri istisnasız olaraq avtomobil sahibləri tərəfindən istifadə olunur. Öz növbəsində, ictimai nəqliyyat, taksi, marketlərə qida məhsullarını daşıyan ekspeditorların yük maşınları, kommunal xidmət və sair avtomobillər, qiyməti təxminən beş ildir ki, dəyişməz qalan və bir litri 0,9 manat təşkil edən “Aİ-92” markalı benzindən istifadə edirlər. Bu, son dərəcə vacib məqam olaraq sübut edir ki, idxal olunan yanacağın istehlak qiyməti inflyasiyaya təsir etmir.

Burada onu da qeyd etmək lazımdır ki, yanacağın qiymətində qlobal eniş olsa da, Azərbaycanın “Aİ-92” markalı benzini postsovet məkanında ən ucuzlardan biri olaraq qalır. Müqayisə üçün qeyd edək ki, 1 iyuldakı məlumatlara görə, ABŞ dolları baxımından “Aİ-92” markalı benzinin bir litrinin qiyməti Azərbaycanda 0,53 dollar, Rusiyada 0.61, Ukraynada 0.90, Gürcüstanda 0.60 dollar təşkil edir.

Azərbaycanda müəyyən növ yanacaq idxalından asılılıq isə 2024-cü ilin sonu - 2025-ci ilin əvvəlində - SOCAR-ın H.Əliyev adına BNEZ-də rekonstruksiya və modernləşdirmə işlərini tamamlamasından sonra aradan qaldırılacaq. Nəticədə emal zavodunun illik gücü səkkiz milyon tona qədər artacaq və yüksək oktanlı yanacaq ölkədə lazımi həcmdə istehsal ediləcək.

ŞƏRH YAZ
0

“Abşeron-şərab” ASC “Gəncə Şərab-2”nin plagiat ittihamlarına cavab verdi

“Abşeron-şərab” ASC “Gəncə Şərab-2”nin plagiat ittihamlarına cavab verdi
17:20
01.07.2020
795
İqtisadiyyat
A
Azərbaycanın üzüm qəbulu, emalı və onun əsasında alkoqol məhsulları istehsalı üzrə ən böyük müəssisəsi olan “Abşeron-Şərab” ASC-nin mətbuat xidməti “Gəncə Şərab-2” şirkəti tərəfindən plagiat ittihamlarına cavab verib.

“Abşeron-Şərab” ASC-nin uğurları, təəssüf ki, ədalətli rəqabətə alışmayan rəqiblərdə həsəd doğurur. İstehsal edilən məhsullarının yüksək keyfiyyəti və düzgün marketinq siyasəti sayəsində “Abşeron-Şərab” ASC son üç ildə spirtli içkilərin ixracında lider mövqeyinə çıxıb və bu mövqeyi qətiyyətlə qoruyur.

Məhsullarımızın ixrac coğrafiyası Almaniya, Polşa, Belarus, Ukrayna, Rusiya və Çin kimi ölkələri əhatə edir. “Abşeron-Şərab” şirkətinin şərab şüşələrinin ixracı 2018-ci ildə 1 milyon 300 min ədəd təşkil edib və artıq 2019-cu ildə 1 milyon 700 minə çatıb. 2018-ci ildə şirkət İqtisadiyyat Nazirliyi və Azərbaycan Sahibkarlar Konfederasiyası tərəfindən “İlin ixracatçısı” mükafatına layiq görülüb.

Son vaxtlar “Gəncə Şərab-2” KİV-də bizə qarşı qara piar kampaniyası başladıb. Güman edirik ki, əsas səbəb məhz onların sağlam rəqabətə dözməməsi və keçmiş müştərilərinin getdikcə rəqibin məhsullarının keyfiyyətsizliyini arqument göstərərək, “Abşeron-Şərab”la əməkdaşlığa üstünlük verməsidir.

“Gəncə Şərab-2” bizi ona məxsus brendlərin adlarından istifadə etməkdə ittiham edir: “Bakı İşıqları”, “Qız Qalası”, “Yeddi Gözəl”, ancaq bu adlar üzərində müəllif hüquqlarını təsdiq edən heç bir hüquqi sənəd təqdim etmir. Sual yaranır: onlar özlərinə aid olmayan və ola bilməyəcək bir şeyə necə haqq iddia edə bilərlər?

Əslində, müəllif hüququ – müəllif və ya müəlliflərin onun (və ya onların) orijinal işi üzərində hüquqlarının məcmusudur. Bununla birlikdə tarixi abidə və tikililər, toponimlər, sənət əsərləri və s. bəşəriyyətin qeyri-maddi mədəni irsidir.

Buna görə “Gəncə Şərab-2” və başqa kimsənin onların adlarının yeganə sahibi olmaq hüququ yoxdur. Yazılış qaydasının qeydiyyatına və ya məhsul etiketlərində dizayna icazə verilir, lakin bu heç kimə “Mədrəsə”, “Qız Qalası”, “Çinar”, “Yeddi gözəl”, “Bakı”, “Abşeron”, “Ağdam” kimi adları mənimsəmək hüququ vermir.

Buna görə də Azərbaycanda istənilən istehsalçı bu adlardan istifadə etmək hüququna malikdir. Bizim məhsullarımızın etiketləri rəqiblərinkindən 100 faiz fərqlənir, bundan əlavə, şərabımızın şüşəsinin ixrac qiyməti “Gəncə Şərab-2” ilə müqayisədə 30 faiz bahadır. Özünüz nəticə çıxarın.

Biz “Gəncə Şərab-2”nin nümayəndəsi ilə razıyıq ki, son illər dövlət yerli məhsulun xarici bazara ixracını stimullaşdırmaqla, maliyyə şəffaflığını yoluna qoymaq və kontrafaktla mübarizə aparmaqla sahibkarlığın inkişafına və xüsusən şərabçılığa böyük diqqət ayırır. Bizə isə istehsalçı kimi, sadəcə, vaxtında vergiləri ödəmək və Azərbaycan məhsullarının beynəlxalq aləmdə təbliği və tanıdılması ilə təmsil etdiyimiz sahəni inkişaf etdirmək qalır.

“Abşeron-Şərab” ASC yerli və beynəlxalq bazarlara etibarlı tərəfdaş və təchizatçı kimi nüfuzunu, həmçinin, şirkət əməkdaşları və müştərilərin yüksək etimadını qiymətləndirir. Və hər kəs üçün asan olmayan bu ağır pandemiya zamanı bütün həmkarlarımıza bizneslərində uğurlar, ən əsası isə sağlam və ədalətli rəqabət arzulamaq istərdik”, - deyə “Abşeron-Şərab” ASC-nin məlumatında bildirilib.

ŞƏRH YAZ
0
BAĞLA