KORONAVİRUSA YOLUXANLARIN SAYI - CANLI STATİSTİKA

"Tahir Əkbər xəstələnəndə nə Elton, nə aşıq Samirə, nə Könül Kərimova gözə dəymədi" — Mərhum bəstəkarın həyat yoldaşından SƏRT AÇIQLAMALAR

18:17
02.03.2020
7450
Mədəniyyət
A
Bu gün Əməkdar incəsənət xadimi, bəstəkar Tahir Əkbərin anım günüdür.

Bununla bağlı “Ölkə.Az” olaraq, bəstəkarın həyat yoldaşı Aybəniz xanımla əlaqə saxladıq. Havanın yağışlı, soyuq olmasına baxmayaraq, Aybəniz xanım ömür-gün yoldaşını bu gün də tək buraxmayıb. Qızı Bəhriyyə ilə bəstəkarın qəbrini ziyarət edən xanımı, bəstəkarı yad etməyən bəzi sənət adamlarından da gileylənib.

“İnandırım sizi, hazırda səhnədə parlayan ulduzların  90 faizi bizim evimizdən gəlib keçib. Ancaq bu iki ildə bir dəfə görmədim ki, biri gəlib Tahir Əkbərin qəbrini ziyarət etsin, 2 dənə gül qoysun”, - deyə o, qeyd edib.

“Bizə bu iki il də onsuz çox çətindir. Nə mənim, nə də Tahir müəllimin çox qohumumuz yoxdur. Ailəmiz 3 nəfərdən ibarət idi, mən, Tahir müəllim, bir də qızımız Bəhriyyə. İndi ailəmiz 2 nəfərdən ibarətdir”.

Əməkdaşımızın “Tahir müəllimin son günləri necə keçirdi, özünü necə hiss edirdi?” sualına cavab olaraq Aybəniz xanım bunları deyib.

“Son 4 ayı demək olar ki, bizim üçün də, onun özü üçün də çox çətin idi. Xəstəliyinin 3 ayını xəstəxanada keçirdi, son 1 ayını isə evdə idi. Bu zaman ərzində, o, nə gəzə, nə də danışa bilirdi. Sağ olsun, bu zaman ərzində bizə Birinci vitse-prezident Mehriban Əliyeva dəstək oldu, bütün xərcləri öz üzərinə götürdü. Bizə sözün əsl mənasında arxa-dayaq oldu. Bunun üçün mən də, qızım da ona ömrümüzün sonuna qədər minnətdarıq”.

Aybəniz xanım onun son günə qədər yaddaşının yerində olduğunu, hər şeyi başa düşdüyünü, sadəcə danışa bilmədiyini qeyd edib.

“O, son günlərinə qədər düzdür, danışa bilmirdi, ancaq hər şeyi başa düşürdü. Efirdə nəğmələri səslənəndə əli ilə işarələr edirdi, bilirdi ki, öz musiqisidir”.
Bəstəkarın həyat yoldaşı onun xəstəliyindən bir gün əvvəl dediyi son sözlərini də xatırlayıb.

“Tahir müəllim, 2015–ci ildə beyin əməliyyatı keçirmişdi. İnsult keçirməmişdən bir gün əvvəl 2017-ci il noyabrın 1-də biz bir yerdə 3 tədbirdə iştirak etdik. Axşam 21:30-da evə gəldik, vəziyyəti yaxşı idi. Həmin gün qızım oturub dərsə hazırlaşırdı, Tahir müəllim gecə 2-3 arası ayılıb, Bəhriyyəyə deyib ki, “Sən hələ yatmamısan?”. Son sözü bu olub. Ondan bir neçə saat sonra, səhər saat 6-da insult keçirdi və ağır vəziyyətdə biz onu xəstəxanaya çatdırdıq. Üzülürəm ki, danışa bilmədi, mənə vəsiyyət edə bilmədi, buna zamanı çatmadı”.

Aybəniz xanım bəstəkarın mahnıları ilə məşhurlaşan müğənnilərdən də söz açıb.

“Mən sizə bir söz deyim, necə pis vəziyyətdə olsam belə müğənnilərdən heç vaxt kömək istəmərəm. Çünki onlar Tahir müəllimin sağlığında qədrini bilmədilər.  Yuxarıda qeyd etdim, yenə də demək istəyirəm ki, Tahir müəllim hər bir müğənniyə çox qayğı ilə yanaşıb. Onların çoxu o, xəstələnməmişdən bizə gəlirdilər, mahnılarını ifa edirdilər. Kimlər bizim evdən keçməyib ki? Adlarını da çəkə bilərəm, Könül Kərimova, aşıq Samirə, Elton Hüseynəliyev, xalq ulduzu müsabiqəsinin uşaqları. Nədənsə, Tahir müəllim xəstələndikdən sonra, onların heç biri gözümə dəymədi. Sözsüz ki, içlərində sonuna qədər yanımızda olan, bizə dəstək olanlar da olub. Bunlar Aybəniz Haşımova, Azər Zeynalov, Firuzə İbadova, Zöhrə Abdullayeva, Eldəniz Məmmədov, Zakir Əliyev idi.

Tahir müəllimin xəstəliyi barədə 4 ay boyu bütün saytlar, xəbər portalları yazdı, televiziyalar göstərdi, bundan xəbərsiz olmaq mümkün deyildi. 
Sonda qeyd etmək istəyirəm ki, Tahir müəllim hər zaman yaşayacaq, hətta onun musiqisi 1979-cu ildə Mistislav Rastrapoviç tərəfindən ifa edilib. O, böyük bəstəkar, çox gözəl insan idi. O, Azərbaycan musiqi tarixində öz adını qızıl hərflərlə yazdırmağı bacarıb. Mən inanıram ki, illər ötsə də Azərbaycan xalqı Tahir Əkbəri unutmayacaq”,- deyə o,  fikrini tamamlayıb.

Qeyd edək ki, bəstəkar Tahir Əkbər 2018–ci il mart ayının 2-də beyin insultu keçirməsi nəticəsində vəfat edib.

Vüsalə Balayeva
Ölkə.Az

ŞƏRH YAZ
0

İctimai xadim, professor Çingiz Abdullayevin 60 illik yubileyidir — QISA BİOQRAFİYA

İctimai xadim, professor Çingiz Abdullayevin 60 illik yubileyidir
22:14
01.04.2020
1883
Mədəniyyət
A
1 aprel 2020-ci il tarixində professor, texnika üzrə fəlsəfə və kulturologiya üzrə elmlər doktoru, Alman–Azərbaycan Cəmiyyətinin sədri, “Azərsu” ASC-nin sədrinin müşaviri, sülh səfiri, Azərbaycan Jurnalistlər və Yazıçılar birliklərinin fəxri üzvü Çingiz Abdullayevin 60 yaşı tamam olur.

Çingiz Əli oğlu Abdullayev 1 aprel 1960-cı ildə Ağstafa şəhərində ziyalı ailəsində anadan olub. 1977-1982-ci illərdə Azərbaycan Dövlət Neft Akademiyasının mühəndis-mexanik ixtisası üzrə təhsil alıb. 

1982–1985-ci illərdə Keşlə maşınqayırma zavodunda mühəndis olaraq başlamışdır. 1985–1990-cı illərdə Azərbaycan Dövlət Neft Akademiyasında əyani aspirant, elmi işçi və müəllim işləyib.  

1990–1994-cü illərdə Alman–Azərbaycan Cəmiyyətinin Azərbaycanda nümayəndəsi olub. Dünyanın müxtəlif, aparıcı kitabxanalarında alman, ingilis, rus və italyan dillərində kitabları saxlanılır. Bundan başqa, onun həm Azərbaycanda, həm də xarici ölkələrdə ərsəyə gələn bir çox sənədli filmlərin ssenari müəllifi olub. 

2008–2011-ci illərdə Bakı Slavyan Universitetinin V.f.Humbolt adına tədris və mədəniyyət mərkəzinin qurucusu və rəhbəri olub. 2011–2015-ci illərdə Bakı Slavyan Universitetinin Avropaşünaslıq kafedrasının professoru, Ölkəşünaslıq laboratoriyasının elmi işçisi vəzifəsində işləyib.  

2013–2014-cü illərdə Azərbaycan Respublikası Prezidenti yaninda Ali Attestasiya Komissiyasının eksperti olub. 2011–2012 və 2015–2016-cı illərdə Azərbaycan Dövlət Mədəniyyət və İncəsənət Universitetinin Dissertasiya Şurasının üzvü olub.  

1994-cü ildən Alman–Azərbaycan Cəmiyyətinin sədridir. 2011-ci ildən “Azərsu” ASC-nin sədrinin müşaviridir.  

2016-cı ildən Bakı Slavyan Universitetinin Azərbaycan Multikulturalizm kafedrasının professorudur. 

Ölkə.Az kollektivi adından görkəmli alimimizi təbrik edir, ona uğurlar arzulayırıq. 

ŞƏRH YAZ
0

Yaşı 65-i keçmiş məşhur sənətkarlarımız karantin rejiminə əməl edirmi? — ÖZLƏRİ CAVABLAYIR

Yaşı 65-i keçmiş məşhur sənətkarlarımız karantin rejiminə əməl edirmi?
15:11
31.03.2020
3120
Mədəniyyət
A
Ölkədə koronavirusla əlaqədar karantin rejimi elan olunandan sonra 65 yaşlı insanların da küçəyə çıxmasına qadağa qoyulub. Ancaq bir çox hallarda yaşlı insanlar bu qadağalara riayət etmirlər. Maraqlıdır, yaşı 65-i ötmüş məşhur sənət adamları bu barədə nə düşünürlər?

''Ölkə.Az'' olaraq yaşı 65-i ötmüş xalq artistləri arasında sorğu keçirdik. Həmin sorğunu təqdim edirik. 

Xalq artisti Rafiq Əzimov ölkənin çətin günündə karantin rejiminə güclü əməl etdiyini bildirib.
''Mən dövlət sərəncam verdiyi ilk gündən etibarən evdə karantin rejiminə xüsusi əməl edirəm. Evə bazarlıq etməyə də, mənə nəvəm kömək edir. Hətta əvvəllər evə gəlsə də, son günlərdə aldığı ərzaqları qapının ağzına qoyub çıxıb gedir. Mən çox istəyirəm ki, bu qayda-qanuna hər kəs əməl etsin. Əməl etməyən şəxslərə isə üzümü tutub deyirəm ki, onlardan yaşlı nəslin nümayəndəsi kimi xahiş edirəm tək özlərini deyil, ailələrini, qohumlarını, öz millətlərini qorusunlar. Bütün dünyaya bəla üz verib, lakin inanıram ki, bu çətin günlər çox çəkməyəcək. Dövlət bütün səyi ilə xalqımızın qayğısına qalır. Efirlərdə maskaları əl altından satan insanları görəndə isə çox məyus oluram. Həmin şəxslərə ar olsun ki, xalqın çətin günündə onların nifrətini qazanırlar. İkinci dünya müharibəsi başlayanda mənim 3 yaşım var idi. Mən xatırlayıram ki, həmin illərdə xalq bir olub, bir-birlərinə dəstək oldular. Biz həmin birliyin nəticəsində qalib gələ bilmişik. Çünki hamı bir məqsədə qulluq edirdi. Öz həmkarlarım da tez-tez zəng edib mənim vəziyyətimlə maraqlanırlar. Lakin elə sənətçilər var ki, mən televiziyada görürəm ki, onlar karantin rejiminə əməl etmirlər. Biz Sənət adamları ilk növbədə qayda-qanuna əməl etməliyik ki, xalqa nümunə olaq. Mən öz dövlətimizə, işlərini bu çətin günlərdə canla-başla görən həkimlərimizə, media nümayəndələrimizə öz təşəkkürümü bildirirəm''. 

Rafiq Əzimov - Vikipediya

Xalq artisti Faiq Sücəddinov isə hər kəsi pozitiv olmağa səslədiyini deyib.
''Bilirəm ki, bu gündən etibarən ümumiyyətlə küçəyə çıxmaq olmaz. Fikirləşirəm ki, biz hər birimiz bu qanuna tabe olmalıyıq. Son zamanlarda demək olar ki, bayıra çıxmıram. Başımı qarışdırmaq üçün evdə öz işlərimlə məşğul oluram. Lakin mən düşünürəm ki, televiziyada psixoloqlar insanları, xalqı sakitləşdirməlidirlər. Ona görə ki, bütün günü karonavirusdan danışmaq olmaz. Müsbət verilişlər də vermək lazımdır. Bizim çox gözəl sənətkarlarımız olub. Həmin sənətkarların zarafatlarını, filmlərini efirə vermək daha yaxşı olardı. Biz özümüzü qoruyub dövlətə kömək etməliyik. Çalışaq ki, pozitiv olaq bu günlərdə. Çünki koronavirus müvəqqəti bir vəziyyətdir. Tezliklə də çıxıb gedəcək. Sadəcə olaraq danışıb-gülməklə, zarafatla yola vermək lazımdır''.

Ən böyük xarici qonaq mən özüməm" - Faiq Sücəddinov - ATV.AZ

Xalq artisti Mübariz Tağıyev isə televiziyada psixoloqların insanları sakitləşdirməsini istədiyini deyib.
''Əgər evdən çıxmamaq bizim həyatımızı xilas edirsə deməli evdən çıxmamalıyıq. Düşünürəm ki, efirlərdə psixoloqlar çıxış etməlidirlər. Çünki ölkədə ümumi gərginlik hökm sürür. Eyni insanların efirə çıxmasındansa həkimlərin və psixoloqların məsləhətləri daha faydalıdır. Mən televiziyada laqeyd insanları gördükdə dəhşətə gəlirəm. Kiminsə özünə və sağlamlığına yazığı gəlmirsə, ailəsini yaxınlarını da düşünmür? Əgər az itki vermək istəyiriksə mütləq şəkildə deyilənlərə əməl etməliyik''.

Müğənni, aktyor Mübariz Tağıyev bioqrafiyası həyatı haqqında ...

Ölkə.Az

 

ŞƏRH YAZ
0
BAĞLA