“Türk Şurası qarşısına qoyduğu hədəflərə nail olacaq”
“Türk Şurasının Dövlət Başçılarının 7 - ci Zirvə toplantısı bölgəmizdə ciddi prooseslərin baş verdiyi bir mərhələdə keçirirlir. Mən hələ qurumun 2003-cü ildə Naxçıvanda yaranması və bu il 10 illik yubleyinin qeyd edilməsini demirəm. Çünki təşkilat bu müddət ərzində bir çox uğurlara imza atıb. Türkdilli dövlətlərin sıx əməkdaşlığına, eyni zamanda bir sıra irimiqyaslı iqtisadi, tranzit layihələrinin rellaşmasına öz töhfələrini veriblər”.
Bunu “Ölkə.Az”a açıqlamasında deputat Cavid Osmanov deyib.
Onun sözlərinə görə, Azərbaycan Türk Şurasının formalaşmasında və ölkələr arasında ticari, iqtisadi, humanitar əlaqələrin qurulmasında, həmçinin regionlararası, transmilli - Bakı-Tiflis Qars dəmiryolu, “Bir kəmər, bir yol” qədim İpək yolunun bərpası məqsədi ilə Bakı-Tiflis-Qars dəmiryolunu Bakı Beynəlxalq Limanı vasitəsi ilə Xəzərdən Qazaxstan, Türkmənistan üzərindən keçməklə Şərqə və Cənub-Şərqə doğru davam etməsi və sair bu kimi meqalayihələrin həyata keçirilməsində müstəsna rol oynayıb.
“Türk Şurasına üzv ölkələr arasında sıx iqtisadi-ticari münasibətlər formalaşıb, müvafiq dövlət qurumları arasında işlərinin koordinasiya olunmuş şəkildə qurulması istiqamətində ciddi işlər görülüb. Ən əsası isə Türk Şurası bir regional təşkilat olaraq artıq dünyada ciddi bir quruma çevrilməkdədir. Bu təşkilata maraq artmaqdadır. Məhz bunun nəticəsidir ki, qurumun sıraları genişlənir və gələcəkdə digər ölkələrin də qoşulacağına əminlik yaradır. Biz Bakıda keçiriləcək yubiley toplantısında Özbəkistanın qurumun tamhüquqlu üzvlüyünə qəbul edilməsinə şahidlik edəcəyik. Əminəm ki, Türk Şurası gələcəkdə qarşısına qoyduğu hədəflərə nail olacaq. Türk Şurası regional təşkilat olaraq dünyada sülhün, sabitliyin, təhlükəsizliyin təmin olunmasına, o cümlədən regionlararası əməkdaşlığın daha da dərinləşməsinə öz töhfəsini verəcək”,- deyə deputat qeyd edib.
Mürtəza
Ölkə.Az
