Bakıda Nuru Paşaya abidə ucaldılması təklif olundu
“Ölkə.Az”-ın məlumatına görə, tədbirdə Milli Məclisin bir qrup deputatı, tanınmış ictimaiyyət və elm xadimləri, ziyalılarla yanaşı, Azərbaycanda səfərdə olan İstanbul Türkiyə Azərbaycan Dayanışma və Kültür Dərnəyinin (İSTAD) rəhbəri Səfər Qaraqoyunlu və üzvləri iştirak ediblər.
Tədbirdə çıxış edən Azərbaycanlıların və digər Türkdilli Xalqların Əməkdaşlıq Mərkəzinin (ATXƏM) sədri, Mətbuat Şurasının İdarə Heyətinin üzvü İlham İsmayılov bildirib ki, Qafqaz İslam Ordusunun Azərbaycana gəlişinin 99-cu ili münasibətilə silsilə tədbirlər təşkil olunur.
Onun sözlərinə görə, sözügedən tədbirlərdə yaxından iştirak etmək üçün Türkiyədən də böyük nümayəndə heyəti Azərbaycana səfərə gəlib:
“Səfər çərçivəsində türkiyəli qonaqlarla bir sıra görüşlər keçiriləcək, Bakıdakı Türk şəhidliyi abidəsi ziyarət olunacaq. Artıq Qubadakı məzarlıq abidəsi ziyarət olunub. Bütün bu cür tədbirlərin təşkil edilməsində əsas məqsəd Qafqaz İslam Ordusunun Azərbaycana gəlişini yad etmək və gənc nəsillərə aşılamaqdır. Gələn il Qafqaz İslam Ordusunun Azərbaycana gəlişinin 100 ili tamam olacaq. Çox istərdik və bura toplaşan hər kəs arzu edir ki, 2018-ci ildə Nuru Paşanın Bakıda abidəsi ucaldılsın. Bununla bağlı ölkə başçısı cənab İlham Əliyevə də müraciət etmişik. Ümid edirik ki, gələn il yüz illik ərəfəsində Azərbaycanda Nuru Paşanın abidəsi ucaldılacaq”.
İSTAD başqanı Səfər Qaraqoyunlu isə deyib ki, ATXƏM, Aşıq Şəmşir Mədəniyyət Ocağı və Azərbaycan Türk Evinin də dəstək verdiyi səfərin əsas məqsədi Qafqaz İslam Ordusunun Azərbaycana gəlişinin 99-cu ilində, 1918-ci ildə Azərbaycanda ermənilər tərəfindən törədilmiş soyqırım faktlarına bir daha diqqət çəkmək, hadisələrin baş verdiyi coğrafi ərazilərdə xatirə tədbirləri keçirtməkdir:
“Bu məqsədlə Gəncə, Şəki, Salyan, Quba və Bakı şəhərində müxtəlif tədbirlər keçirilib, Qubadakı soyqırım məzarlığı və Xatirə kompleksi ziyarət olunub. Sabah da Bakıda Şəhidlər Xiyabanı və Türk Şəhidliyi ziyarət olunacaq. Nuru Paşanın qəbrindən gətirilən torpaq Şəhidlər Xiyabanına səpiləcək”.
Səfər Qaraqoyunlu qeyd edib ki, qurtuluş savaşında Azərbaycan Anadolunun yanındaydı:
“Türkiyə Cümhuriyyətinin təməli həm də Azərbaycanın əvəzsiz qardaş yardımlarıyla atıldı”.
Tədbirdə çıxış edən Milli Məclisin deputatı Hikmət Babaoğlu, Azəri Türk Qadınlar Birliyinin sədri Tənzilə Rüstəmxanlı, ATXƏM sədri İlham İsmayılov, Milli QHT Forumunun prezidenti Rauf Zeyni, Mətbuat Şurası sədrinin müavini Umud Rəhimoğu, “Xalq cəbhəsi” qəzetinin baş redaktoru Elçin Mirzəbəyli və digər görkəmli ziyalılar Nuru Paşanın Azərbaycan tarixində müstəsna yer tutduğunu və buna görə də Bakıda Nuru Paşaya adına layiq abidə ucaldılmasını təklif ediblər.
Təklif zalda əyləşən iştirakçılar tərəfindən alqışlarla qarşılanıb.
Tədbirin sonunda bir qrup tədbir iştirakçısısı mükafatlandırılıb.
Vasif Həsənli
Ölkə.Az
