Tərtərdə Sərsəng su anbarı ilə bağlı müşavirə keçirilib

Bu gün Tərtər rayon gənclər və idman idarəsində Tərtər rayon icra hakimiyyətinin başçısı İordaniyanın və İranın səfirləri ilə görüş keçirib.

Görüşdə rayonun icra başçısı Qarabağ ərazisi ermənilər tərəfindən işğal olunduqdan sonra Sərsəng su anbarına Ermənistan tərəfindən suyun buraxılmaması məsələsi ilə bağlı problemə toxunub.

Ölkə.az-ın Tərtərə ezam olunmuş müxbirinin verdiyi məlumata görə, iclasda çıxış edən icra başçısı və qonaqlar Tərtərdəki bir çox ərazilərin susuzluq probleminə toxunub.

İcra başçısı bildirib ki, Sərsəng su anbarının işğalı nəticəsində 100 min hektar sahədə kənd təsərrüfatına yararlı ərazilərə suyun verilməsi dayandırılıb. Torpaqda gedən eroziya Tərtərlə bərabər qonşu rayonlara da çox böyük zərər vurmuşdur. Hazırda su anbarına və onun qurğularına 10 ildən artıq müddətdir ki, texniki xidmət göstərilmədiyi üçün Sərsəng qəza vəziyyətinə düşüb. Bu səbəbdən Sərsəng su anbarının işğal olunmuş ərazilərdə qalması onun aşağı hissəsində yaşayan 400 min nəfərdən çox əhali üçün ciddi təhlükə yaradır. Hazırda anbar erməni işğalı altındadır.

Xatırladırıq ki, adı çəkilən anbar 1992-ci ildə bir dəfə ordumuz tərəfindən ermənilərdən geri alınmış, amma qısa müddətdən sonra daxili çəkişmələrin nəticəsində anbarın və Ağdərə rayonun müdafiəsində yaranan boşluqdan istifadə edən ermənilər su anbarını və Ağdərə rayonunu yenidən işğal etmişdilər.