Bu gün kəlbəcərli girovların “məhkəməsi” başa çatır

Ermənistan Rusiyanın “girovları azad et” çağırışına məhəl qoymaya bilərmi?

Azərbaycanın işğal olunmuş Xankəndi şəhərində ermənilərin kəlbəcərli girovlar Dilqəm Əsgərov və Şahbaz Quliyevə qarşı oktyabrın 27-də qurduqları “məhkəmə” şousu sona çatmaq üzrədir. Bu gün “məhkəmə”də “vəkillər”in və “prokuror”un çıxışı olacaq. Sonuncu “məhkəmə prosesi”ndə ermənilərin kəlbəcərli girovların öldürdüyü iddia etdikləri Sumbat Çakanyanın qohumları girovların onlara verilməsini tələb ediblər.

Ermənistan mətbuatının yaydığı xəbərə görə, Sumbat Çakanyanın anası bununla bağlı KİV-lərə açıqlama verib: “Bilirəm ki, dekabrın 12-də vəkillərin və prokurorların çıxışı olacaq. İndidən aydındır ki, Əsgərov Sumbatı öldürüb, amma bunu etiraf etmir. Mən oğluma 7 dəfə atəş açan insanın mühakimə olunmasını istəmirəm. Qoy, onu mənə versinlər!”

İşğalçı Ermənistanın və separatçı rejimin isə öz ağaları olan Rusiyanın xarici işlər naziri səviyyəsində girovları azad etmək çağırışından sonra Dilqəm Əsgərov və Şahbaz Quliyevlə bağlı hansı addımı atacaqları maraq doğurur. Bu mövzuda danışan politoloq Qabil Hüseynli hesab edir ki, əgər Rusiyanın xarici işlər naziri Sergey Lavrov Ermənistana girovları azad etmək çağırışında səmimidirsə və Moskva bu məsələnin üzərində ciddi dayanacaqsa, onun forpostu olan Ermənistanın girovları azad etməkdən başqa yolu qalmayacaq: “Rusiyanın xarici işlər nazirinin kəlbəcərli girovlarla bağlı belə bir mövqe bildirməsi sevindiricidir və bu, humanizm kimi qiymətləndirilməlidir. Çox yaxşı olar və ümid edək ki, Rusiya bir açıqlama ilə kifayətlənməyəcək, girovların azad edilməsi üçün gərəkən digər addımları da atacaq.

Lavrovun məhz indiki vaxtda belə konkret və düzgün mövqe ifadə etməsinin bir sıra səbəbləri ola bilər. Görünür, Rusiya da məsələni ciddi şəkildə araşdırıb və tam əmin olub ki, məsələdə kriminal elementlər yoxdur, ermənilərin girov götürdüyü şəxslər heç bir cinayətə, qanun pozuntusuna yol verilməyiblər. Dağlıq Qarabağdakı qondarma rejimin və Ermənistanın erməni zabitinin və bir qadının, həmçinin bir yeniyetmənin öldürülməsi ilə bağlı iddiaları tamamilə boşa çıxdı”. Q.Hüseynlinin fikrincə, ermənilərin qurduğu oyun artıq iflasa uğrayıb. Politoloq düşünür ki, S. Lavrovun girovların azad olunmasının vacibliyini bəyan etməsi ilə ermənilərin oyununun baş tutmadığını söyləmək olar: “Məlum olub ki, öldürülən erməni qadın erməni zabitin məşuqəsi imiş və onların arasında olan ziddiyyətlər hər ikisinin ölümünə gətirib çıxarıb. Yəni Dilqəm Əsgərovun, Şahbaz Quliyevin, həmçinin mərhum Həsən Həsənovun onların ölümü ilə heç bir əlaqəsi yoxdur. Eyni zamanda erməni yeniyetmənin də ölümündə adıçəkilən azərbaycanlıların heç bir rolunun olmadığı sübuta yetirilib. Azərbaycanlılara qarşı irəli sürülən ittihamların çoxu Ermənistanın öz mətbuatı tərəfindən təkzib edilir. Rusiya belə bir vəziyyətdə Dilqəm Əsgərovla Şahbaz Quliyevin girov saxlanmasının beynəlxalq konvensiyalara zidd olduğunu görür. Qondarma məhkəmənin sona çatması ərəfəsində Rusiya xarici işlər nazirinin ”girovları azad edin" çağırışı çox ciddi hadisədir".

Politoloq bildirir ki, Rusiyadan girovların azad olunması çağırışının səslənməsində Azərbaycan hakimiyyətinin, əsasən də prezident İlham Əliyevin kəlbəcərli girovların azad edilməsi üçün şəxsən apardığı iş də ciddi rol oynayıb: “Bəllidir ki, Dilqəm Əsgərovla Şahbaz Quliyevin məsələsi şəxsən İlham Əliyevin nəzarətində idi. Rusiyanın rəhbərliyi ilə aparılan danışıqlar artıq öz bəhrəsini verməkdədir. Lavrovun çıxışı həm də məhz bununla əlaqədardır. Prosesin gedişi, baş verənlər kəlbəcərli girovların azad ediləcəyinə şübhə yeri qoymur. Mən hətta hesab edirəm ki, Kəlbəcərdə qətlə yetirilən mülki şəxs Həsən Həsənova görə Ermənistan cavab verməlidir”./Müsavat.com/

Ölkə.Az