Türkiyəli təhlükəsizlik müşaviri Heydər Əliyev haqqında danışdı
"Belə bir insan həyata yüz ildə bir dəfə gəlir"
Bu gün Heydər Əliyevin vəfatından nə az, nə çox tam 11 il ötür.
Ölkə.Az olaraq Ulu öndərin ən yaxın köməkçilərindən biri, "Özakaya" şirkətinin sahibi Osman Gəzəkərlə əlaqə saxladıq. Onunla Heydər Əliyev haqqında etdiyimiz kiçik söhbətimizi təqdim edirik.
- Bizə Heydər Əliyevlə tanışlığınızdan danışın. Necə tanış oldunuz onunla?
- Mən 1990-cı ildən bu yana Azərbaycanla yaxın münasibətdə olan bir insanam. Araz çayı üzərində Türkiyə ilə Naxçıvanı bir-birinə bağlayan Ümid körpüsünün inşası üçün mərhum Heydər Əliyev tərəfindən göstəriliş verilən ərəfələrdə mən Qarsda polis rəisi idim. 1992-cı ildən etibarən Ulu öndəri tanıma fürsətim yarandı. Bu mənim üçün çox önəmli bir hadisə idi və mən onun təşəbbüsü ilə Bakıya gəldim. O, prezident seçildikdən sonra məni Təhlükəsizlik müşaviri vəzifəsinə təyin etdi.
Heydər Əliyevi tanımadan əvvəl demək olar ki, dünyagörüşüm yox idi. Onunla tanış olduqdan sonra çox dəyişdiyimi hiss etdim. Belə bir insan həyata yüz ildə bir dəfə gəlir. Biz türk milləti, Türkiyə və Azərbaycan olaraq şadıq ki, tarixdə iki böyük insan yetişdirmişik, biri Atatürk, biri isə Heydər Əliyevdir. Bu iki şəxsiyyət tük dünyasının xilaskarlarıdır. 1992-1993-cü illərdən bu günə qədər keçən dövrə nəzər saldığımız zaman Azərbaycan Qafqazda parıldayan bir ulduza çevrildi və sözükeçən güclü bir ölkə oldu. Bu ölkənin lideri də tarixin ən böyük şəxsiyyətlərindən olan Heydər Əliyev idi. Azərbaycanda mənim üçün iki ən əsas önəmli tarix var. Biri 10 May digəri isə 12 dekabr tarixidir.
"Siyasətçi gələcək seçkiləri, əsil lider isə gələcək nəsilləri düşünür"
- Heydər Əliyevi bir cümlə ilə necə ifadə edərdiniz?
- Çörçilin bir sözü var: "siyasətçi gələcək seçkiləri, əsil lider isə gələcək nəsilləri düşünür". Heydər Əliyev daim gələcək nəsilləri düşünərək Azərabyacan üçün atılması lazım olan addımları atıb və türk dünyasında əvəzolunmaz bir liderə çevrilib. O bizim ikinci Atatürkümüzdür. Nur içində yatsın. Allah rəhmət eləsin!.
Zümrüd Cavadova
Ölkə.az
