Millət vəkili: "Ermənistanın girovlarla bağlı şousu alınmadı"
Bu gün BQXK-nin vasitəçiliyi ilə hamısı bir ailənin üzvü olan 5 Ermənistan vətəndaşı Qazax rayonu istiqamətində qarşı tərəfə təhvil verilib.
Bu jestdən sonra girovlarımızın geri qaytarılma ehtimalının olub-olmamasını bilmək üçün millət vəkili Fazil Mustafa ilə əlaqə yaratdıq.
Ölkə.az-a danışan millət vəkili girovların qaytarılmasında yalnız Rusiyanın Ermənistana təzyiqinin rol oynaya biləcəyini bildirdi.
Fazil Mustafa : "Azərbaycanda saxlanılan erməni ailəsinin ölkəsinə qaytarılması Azərbaycan tərəfindən müəyyən dərəcədə edilən jest idi. Amma Ermənistanın bu addımın əvəzində girovlarımızı qaytarmasını proqnazlaşdırmaq bir az çətindir. Yalnız Rusiyanın Ermənistana təziqi rol oynaya bilər. Və onlar bu addımı ata bilərlər. Ermənistanın girovlarla bağlı şousuna gəlincə, bu əslində alınmadı. Onları məhkəməyə çıxartmaq Ermənistanın işğalçılığının bir görüntüsü idi.
Hər halda bundan sonra girovların qaytarılması istiqamətində ola bilsin ki, Ermənistan tərəfindən də addım atılsın".
Qeyd edək ki, Gevorkyanların Azərbaycanda olduqları müddət ərzində Ermənistan Respublikası öz vətəndaşlarının geri qaytarılması üçün bir dəfə də olsun beynəlxalq təşkilatlar qarşısında məsələ qaldırmayıb.
Fatimə İbrahimova
Ölkə.az
