Gürcüstan QHT-lərinin nümayəndələri Gəncədə oldular

Qonaqlar Gəncə şəhərinin son bir neçə ildə olduqca gözəlləşdiyini və inkişaf etdiyini vurğulayıblar.

Ölkə.Az-a daxil olan məlumata görə, Gürcüstanın ən fəal QHT-ləri Gəncə şəhərinə səfər ediblər.

"Odlar Yurdu" Gənclər İctimai Birliyinin təşkilatçılığı ilə keçirilən görüşün əsas məqsədi iki qonşu ölkə arasında münasibətlərdə gənclərin fəallığının artırılması, Gürcüstan və Azərbaycan gəncləri arasında dostluq və əməkdaşlıq münasibətlərinin inkişafına xidmət etməkdir.

Gürcüstan-Azərbaycanlı Gənclər Assosiasiyasının sədri Samirə İsmayılova, "Azad Zona" QHT-nin və media qrupunun rəhbəri Koba Xabazi, "Gənclər Avropalı Gələcək üçün" QHT-nin rəhbəri Manana Andgulace, həmçinin, gənclər təşkilatlarının fəal üzvləri Heydər Əliyev Parkı, Heydər Əliyev Mərkəzində, Nizami Gəncəvi Mərkəzində, Qala Qapı müzeyində və Gəncənin mərkəzində gəzinti keçiriblər.

Qonaqlar Gəncə şəhərinin son bir neçə ildə olduqca gözəlləşdiyini və inkişaf etdiyini vurğulayaraq, bu sürətli inkişafa heyranlıqlarını bildiriblər. Həmçinin, səfər zamanı "Azad Zona" media qurumu üçün Gəncə şəhəri ilə bağlı reportajlar hazırlanıb.

9-10 dekabr 2014-cü il tarixini əhatə edən səfər "Odlar Yurdu" Gənclər İctimai Birliyinin ofisində Birliyin fəaliyyəti ilə tanışlıq, Gəncənin 2016-cı ildə Avropa Gənclər Paytaxtı seçilməsi, Gəncə şəhərində gənclərə və gənclər təşkilatlarına yaradılmış şərait və bu şəraitin yaratdığı imkanlar, bu imkanlardan faydalanaraq gələcək əməkdaşlıqların müzakirəsi və s. mövzuları əhatə edən görüşlə yekunlaşıb.