Üç rayonda 500-dən çox sürücü cərimələnib

Baş Dövlət Yol Polis İdarəsi məlumat yaydı.

İki gün ərzində 3 rayonda keçirilən reydlər zamanı yol polisi əməkdaşlarının qanuni tələbinə əməl etməyən və ona müqavimət göstərən 3 nəfər saxlanılıb, onlar barəsində İnzibati Xətalar Məcəlləsinin 310-cu maddəsi ilə materiallar tərtib olunaraq məhkəməyə göndərilib.

Ölkə.Az-ın apa-ya istinadən məlumatına görə, bu sözləri Baş Dövlət Yol Polisi İdarəsinin Yol-Patrul Xidməti şöbəsinin rəisi, polkovnik Ərəstun Məcidov bildirib.

Onun sözlərinə görə, Daxili İşlər Nazirliyinin rəhbərliyinin göstərişinə əsasən yol polisi əməkdaşları tərəfindən Ağdaş, Yevlax və Göyçay rayonlarında hərəkətin təhlükəsizliyinin təmin edilməsi məqsədilə keçirilən tədbirlər zamanı yol nəqliyyat hadisələrinin baş verməsinə bilavasitə səbəb ola biləcək qayda pozuntuları aşkar edilib.

Ərəstun Məcidov qeyd edir ki, nəqliyyat vasitəsinin sərxoş idarə edilməsi, sürət həddinin aşılması, ötmə qaydalarının pozulması, qəza şəraitinin yaradılması və digər qayda pozuntularının aşkar olunması ilə bağlı təşkil olunan bu reydlər zamanı 500-dən çox sürücü barəsində inzibati tədbir görülüb.

Həmçinin, reyd zamanı 200-dən çox sürücü təhlükəsizlik kəmərindən istifadə etməməsi ilə bağlı, 5 sürücü avtoxuliqanlıq etdiyi üçün inzibati məsuliyyətə cəlb olunub, 500-dən çox sürücüyə isə şifahi xəbərdarlıq edilib, onlarla profilaktik söhbət aparılıb.

Reyd zamanı yol polisi əməkdaşlarının göstərişlərinə əməl etməyən, nəqliyyat vasitəsini yüksək sürətlə idarə edib asayiş keşikçilərinə tabe olmaq istəməyən sürücülərə də rast gəlinib. Reyd zamanı bir neçə vəzifəli şəxs də polisin dayanmaq göstərişinə əməl etməyib. Həmin sürücülər saxlanılaraq lazımi tədbirlər görülüb.

Ə.Məcidov bildirib ki, aparılan təhlil və müşahidələrə görə sürücülük intizamının səviyyəsi aşağı olan və yol-nəqliyyat hadisələrinin baş vermə ehtimalının yüksək olduğu yerlərdə bu cür reydlər ilin sonunadək və bayram günlərində davam etdiriləcək, sonda ictimaiyyətə geniş məlumat veriləcək.

Ölkə.Az