Ərini öldürən qadın "Rembo" imiş?
İntiqam VALEHOĞLU
Bu haqda status yazdım, amma ürəyim soyumadı. Əvvəlcə baş verən hadisəni qıssaca izah etməyə çalışım. Bakının Sabunçu rayonunda 23 yaşlı gənc qadın 28 yaşlı həyat yoldaşını öldürüb. Deyilənlərə inansaq, problemli ailəymiş, evdə tez-tez davaları olurmuş. Hətta hadisə baş verən gündən bir həftə əvvəl qadın əri tərəfindən döyülübmüş. Elə buna görə də qolu gipsdə gəzirmiş. İki də azyaşlı övladları var.
Bəli, böyük faciədir. İki ailə övladını itirdi. Biri müvəqqəti, biri ömürlük. İki övlad valideynsiz qaldı. Biri ömürlük, biri müvəqqəti. İki gəncin taleyi qaraldı. Biri bəlkə nə vaxtsa ağara biləcək, o biri ömürlük.
Ancaq faciənin özünün içində elə faciələr var ki, bəlkə də həmin gəncin ölümündən də daha betər. Çünki bu laqeydlik bəlkə də hələ çox canlar alacaq. Məsələ burasındadır ki, qadın hadisədən bir müddət əvvəl dəfələrlə polisə şikayət edibmiş. Yəni polisin işdən xəbəri varmış. Amma niyə oğlan barədə tədbir görülməyib, bax o maraqlıdır?
Sabunçu elə bir rayondur ki, orada kimsə həyətində üzr istəyirəm ayaqyolu tikmək istəyəndə sahə müvəkkilindən tutmuş, bələdiyyə sədrinə qədər hərə qoltuğuna bir qovluğu vurub gəlir ki, qanunsuz tikirsiz. Bir az danışırsan, söhbətləşirsən, "dostlaşırsan", məlum olur ki, tikdiyin tikinti nəinki qanunsuzdur, hətta kimsə sənin tikdiyinin qanunsuz olduğunu desə, o adamın özünə iş düşür.
Və bu kimi məsələlər üçün hər məhəllənin öz adamı var. Məsələn, 100 "kubik" almısan ki, qapında bir əl yeri tikəsən, dərhal həmin "qonşu" xəbər tutur və sonrası da məlum. Bəs nədən aidiyyatı qurumlar bu məsələyə biganə yanaşıb. Səbəb çox sadədir. "Çörəksiz iş" imiş. Əgər əksini sübut etmək istəyən varsa, buyursun.
Kimsə durub deyəcək ki, bizim cəmiyyətdə qadının ərindən şikayət etməsinə yaxşı baxılmır və sair. Tam haqlısınız. Amma qadın davamlı şəkildə döyülürsə, söyülürsə, nə etməlidir? Axı bu qadın "Rembo" deyil. Heç "Terminator" da deyil. Amma kişilərin dilinə yüz qram araq dəyən kimi Vandamdan da beş betər olurlar. Hər halda qatıq görməsək də, qatıqlı qazan görmüşük. Yəni, içməsək də, içib belə edənlərdən xəbərimiz var.
Yeri gəlmişkən, bu məsələdə qadının valideynlərinin də böyük məsuliyyəti var. "Yalnız meyitin ər evindən çıxacaq" deyən valideyn fikirləşməliydi ki, bir gün qızı da ərinin meyitini həmin evdən çıxara bilər. Ona görə də təki qız evdə qalmasın, üstümüzə yük olmasın kimi fikirlərlə qızlarınızı kimə gəldi verməyin. Başınızdan elədiyiniz o "yük" sonradan arxasınca dustaqxanalara yemək daşıdığınız və valideyni olduğunuzu deməyə utandığınız "turemşik"ə çevriləcək. İndiki kimi...
Ölkə.Az
