Həftənin icmalı
Baş prokurordan yeni addım
Azərbaycan Respublikasının Prezidenti cənab İlham Əliyevin tapşırıq və tövsiyələrinə uyğun olaraq prokurorluq orqanlarında vətəndaşların qəbulu məsələlərinə xüsusi diqqət göstərilməklə əhalinin müraciətlərinə qayğı ilə yanaşılması, ərizə və şikayətlərə tam, hərtərəfli və obyektiv baxılması işinin daha da təkmilləşdirilməsi və bu sahədə müasir informasiya-kommunikasiya texnologiyalarının imkanlarından daha geniş istifadə edilməsi üzrə ardıcıl və sistemli tədbirlərin görülməsi davam etdirilir.
Bakı polisində böyük kadr dəyişikliyi
Bakı şəhər Baş Polis İdarəsinin (BŞBPİ) yüksək rütbəli 6 əməkdaşı işdən çıxarılıb.
Ölkə.Az apa-ya istinadən xəbər verir ki, idarənin rəisi, polis general-mayoru Mirqafar Seyidovun imzaladığı müvafiq əmrlərlə BŞBPİ-nin Kadrlar idarəsinin rəisi Səbuhi Cəfərov, Narkotiklərlə Mübarizə İdarəsinin rəisi Musa Hacıyev, onun müavini Mövsüm Qurbanov, Təşkilati-İnspektor İdarəsinin rəisi Əli Hacıyev, Təhqiqat İdarəsinin rəisi Ayxan Bağırov və Katibliyin rəisi Namiq Aslanov tutduqları vəzifədən azad ediliblər.
İlham Əliyev sərəncam verdi
Azərbaycan Respublikasının Prezidenti İlham Əliyev Ağa-Bala Şamxal oğlu Hacıyev “Şöhrət” ordeni ilə təltif edilməsi haqqında sərəncam imzalayıb.
İlham Əliyev Sabirabada səfər etdi
Bu gün prezident İlham Əliyev Sabirabad rayonuna səfər edib.
Dövlət başçısı rayonda bir sıra infrastruktur və sosial təyinatlı obyektlərin açılışında iştirak edib. Prezident İlham Əliyev Nizami-Əliləmbəyli-Azadkənd-Sarxanbəyli avtomobil yolunun açılışında iştirak edib.
Daha sonra prezident İlham Əliyev Sabirabad şəhərində əsaslı şəkildə yenidən qurulan Mədəniyyət Evində yaradılan şəraitlə tanış olub. Sabirabada səfəri çərçivəsində dövlət başçısı Heydər Əliyev Fondunun təşəbbüsü ilə inşa olunan uşaq bağçasının açılışında da iştirak edib.
İranla əməkdaşlıq istiqamətində mühüm addım
Azərbaycan Prezidenti İlham Əliyev Azərbaycan və İran hökumətləri arasında informasiya və kommunikasiya texnologiyaları sahəsində əməkdaşlıq haqqında Anlaşma Memorandumunun təsdiq edilməsi barədə fərman imzalayıb.
Fərmanda qeyd edilib ki, Azərbaycan Respublikasının Hökuməti ilə İran İslam Respublikasının Hökuməti arasında informasiya və kommunikasiya texnologiyaları sahəsində əməkdaşlıq haqqında 2014-cü il noyabrın 12-də Bakı şəhərində imzalanmış Anlaşma Memorandumu təsdiq edilsin.
Ailənin tək oğlanları əsgər gedəcəkmi? — Milli Məclisdə müzakirə
"Onların ön cəbhədə xidmət məsələsinə mütləq baxılmalıdır".
Ailənin tək oğlunun ön cəbhəyə aparılması, eyni zamanda magistr təhsili alan tələbələrə möhlət hüququnun verilməsi zaman-zaman müzakirə mövzusuna çevrilib.
Ölkə.Az xəbər verir ki, Milli Məclisin iclaslarında YAP icra katibinin müavini, deputat Siyavuş Novruzov və Bakı Dövlət Universitetinin rektoru Abel Məhərrəmov dəfələrlə magistrlərə hərbi xidmətdən möhlət verilməsi məsələsinə yenidən baxılmasını təklif ediblər.
Azərbaycanda dərman vasitələrinin qiymətini dövlət tənzimləyəcək
Azərbaycanda dövlət qeydiyyatına alınmış dərman vasitələrinin qiyməti bundan sonra müvafiq icra hakimiyyəti orqanı tərəfindən tənzimlənəcək.
Bu barədə məsələ “Dərman vasitələri haqqında” Azərbaycan Respublikasının Qanununa təklif edilən dəyişikliklərdə öz əksini tapıb.
Bu gün Milli Məclisin plenar iclasında müzakirəyə çıxarılan dəyişikliklərə əsasən, dərman vasitələrinin ekspertiza xidmətlərinin tarifləri və dövlət qeydiyyatına alınmış dərman vasitələrinin qiymətləri müvafiq icra hakimiyyəti orqanı tərəfindən tənzimlənəcək.
İlham Əliyev fərdi təqaüdün verilməsi barədə sərəncam imzaladı
Azərbaycan Respublikasının prezideni İlham Əliyev F.İ. İsmayılova Azərbaycan Respublikası Prezidentinin fərdi təqaüdünün verilməsi haqqında sərəncam imzalayıb.
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq və “Azərbaycan Respublikası Prezidentinin fərdi təqaüdünün təsis edilməsi haqqında” Azərbaycan Respublikası Prezidentinin 2002-ci il 11 iyun tarixli 715 nömrəli Fərmanına uyğun olaraq qərara alıram:
1. Azərbaycan Respublikasının ictimai-siyasi həyatında fəal iştirakına görə Fikrət İsmayıl oğlu İsmayılova Azərbaycan Respublikası Prezidentinin fərdi təqaüdü verilsin.
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.
Müdafiə sənayesi işçiləri təltif edildi — SİYAHI
Azərbaycan prezidenti İlham Əliyev müdafiə sənayesi işçilərinin təltif edilməsi haqqında sərəncam imzalayıb.
Azərbaycanda müdafiə sənayesinin inkişafındakı xidmətlərinə və dövlət qulluğunda səmərəli fəaliyyətlərinə görə aşağıda adı olan şəxslər təltif ediliblər:
“Tərəqqi” medalı ilə:
Ağayev Mirzə Əhmədağa oğlu
Dəmirov Əmiraslan Dəmir oğlu
Hüseynəliyev İmran Heydərəli oğlu
Qurbanov İlqar Davud oğlu
Qurbanov Kamil Qəzənfər oğlu
Mərdanov İlham Qurban oğlu
Paşayev Namiq Muxtar oğlu
Virskiy İqor Sergeyeviç
“Dövlət qulluğunda fərqlənməyə görə” medalı ilə:
Əsədov Bəxtiyar Böyükkişi oğlu
Haqverdiyeva Səidə Camal qızı
Qədirov Qədir Abduləli oğlu
Nuriyev Fəhrat Neman oğlu
Azərbaycanın üç ali məktəbi 100 ən yaxşı universitet reytinqdə
Reytinq 30 ölkəni əhatə edir.
Quacquarelli Symonds (QS) agentliyi Avropa və Mərkəzi Asiyanın inkişaf etməkdə olan ölkələrinin ali məktəblərinin yeni reytinqini açıqlayıb.
Ölkə.Az oxu.az-a istinadən məlumatına əsasən, 100 ali məktəbin yer aldığı “QS University Rankings: İnkişaf etməkdə olan Avropa və Mərkəzi Asiya 2014/15” reytinqdə Azərbaycanın üç ali məktəbi – Bakı Dövlət Universiteti, Qafqaz və Xəzər universitetləri də var. Ali məktəblər müvafiq olaraq 39.4, 38.5 və 39.6 balla 71-80 ci yerdədirlər.
Quacquarelli Symonds (QS) agentliyinin reytinqi ali məktəblərin qlobal reytinqləri arasında ən nüfüzlusudur. Reytinq 30 ölkəni əhatə edir: Albaniya, Ermənistan, Azərbaycan, Belarus, Bosniya və Hersoqovina, Bolqarıstan, Xorvatiya, Çexiya, Estoniya, Macarıstan, Gürcüstan, Qazaxıstan, Kosovo, Qırğızıstan, Latviya, Litva, Makedoniya, Moldova, Çernoqoriya, Polşa, Rumıniya, Rusiya, Serbiya, Slovakiya, Sloveniya, Tacikistan, Türkmənistan, Türkiyə, Özbəkistan, Ukrayna.
Reytinqdə ilk onluğa Azərbaycanda da filialı olduğu M.V. Lomonosov adına Moskva Dövlət Universiteti başçılıq edir.
Onluğa həmçinin Varşava Universiteti (Polşa), Tartuskiy Universiteti (Estoniya), Praqada Çexiya Texniki Universiteti, Sankt-Peterburq Dövlət Universiteti, Yagellonskiy Universiteti (Polşa), Yaxın Şərq Texniki Universiteti (Türkiyə) və Masarikov Universiteti (Çexiya) daxildir.
Prezident "Qarabağ"dan danışdı
Dekabrın 17-də Azərbaycan Respublikasının Prezidenti İlham Əliyev “Qarabağ” futbol klubunun üzvlərini qəbul edib.
“Qarabağ futbol klubu ölkəmizi beynəlxalq yarışlarda layiqincə təmsil edir”, - deyən Prezident İlham Əliyev futbolun inkişafının Azərbaycanda dövlət siyasəti olduğunu, bununla bağlı Dövlət Proqramının qəbul edildiyini diqqətə çatdırdı.
Dövlət başçısı bildirdi ki, Azərbaycan dünyada idman ölkəsi kimi tanınır və beynəlxalq idman qurumları uğurlarımızı yüksək qiymətləndirirlər. İdmançılarımızın da mütəmadi olaraq xalqımızı sevindirdiyini, Olimpiya Oyunlarında yüksək nəticələr göstərdiyini deyən dövlətimizin başçısı London Yay Olimpiya Oyunlarında və Çində keçirilən Yeniyetmələrin Yay Olimpiya Oyunlarında gənclərimizin yüksək nəticələr göstərdiklərini vurğuladı.
Azərbaycandakı bütün məscidlərdə mühafizə sistemi qurulur
Azərbaycanda fəaliyyət göstərən bütün məscidlərdə mühafizə sisteminin qurulması ilə bağlı iş aparılır.
Ölkə.Az-ın apa-ya istinadən xəbərinə görə, bunu Dini Qurumlarla İş üzrə Dövlət Komitəsinin sədri Mübariz Qurbanlı deyib.
Azərbaycanda bəzi məscidlərin xüsusi mühafizə sisteminin olduğunu deyən M. Qurbanlı amma bunun bütün məscidlərdə olmadığını açıqlayıb: “Ona görə də hesab edirik ki, məscidlərdə mühafizə sisteminin qurulması zəruridir. Biz bu istiqamətdə işlər görürük”.
Leyla Əliyeva kitaba müqəddimə yazdı
Moskvada “Mədəniyyətlərin dialoqu: sosial, siyasi və dəyər aspektləri” kitabı çapdan çıxıb.
Kitab çapa Rusiya Elmlər Akademiyasının (REA) Fəlsəfə İnstitutu, Azərbaycan Milli Elmlər Akademiyasının Fəlsəfə və Hüquq İnstitutu, Rusiya Kulturologiya İnstitutu, Rusiya Fəlsəfə Cəmiyyəti və Heydər Əliyev Fondunun Rusiyadakı nümayəndəliyi tərəfindən hazırlanıb.
Kitaba müqəddiməni Heydər Əliyev Fondunun vitse-prezidenti Leyla Əliyeva yazıb. O, qeyd edib ki, bu kitab Azərbaycan, Rusiya, Qazaxıstan və bir sıra digər ölkələrin alimlərinin mədəniyyətlərin dialoqu, qloballaşma dövründə onun çoxşaxəliliyi, dinamikası haqqında diskussiya və düşüncələrinin yekunudur.
Bakı Dövlət Universitetinin 95 illiyi qeyd olundu
Bakı Dövlət Universitetinin (BDU) 95 illik yubileyinə həsr olunan tədbir keçirilir.
Tədbirdən öncə BDU rəhbərliyi və kollektivi Fəxri xiyabanda Heydər Əliyevin məzarını ziyarət ediblər. Daha sonra BDU-da “Universitetin təsis edilməsi” rəsm tablosunun açılışı olub. Sonra isə qonaqlar universitetin 95 illiyi ilə bağlı sərginin açılışında iştirak ediblər.
Avropa Oyunlarının keçiriləcəyi ərazidə yaşayanlara buraxılış vərəqəsi paylanacaq
Xəbərdarlıq yayılıb.
Bakı-2015 Avropa Oyunlarının keçirildiyi ərazi və ətraf ərazilərdə yaşayan sakinlərin avtomobillə mənzillərinə sərbəst daxil olmaları üçün xüsusi buraxılış vərəqələri veriləcək.
Ölkə.Az-ın verdiyi məlumata əsasən, bu sözləri Səbail rayon İcra Hakimiyyətinin ictimai-siyasi şöbəsinin müdiri İsrafil Kərimov oxu.az-a bildirib.
İnternetdə bu barədə xəbərdarlığı əks etdirən elanın yayılması məsələsinə münasibət bildirən İsrafil Kərimov vurğulayıb ki, Avropa Oyunları ərəfəsində Bakı şəhərinə avtomobil axını müşahidə olunacaq.
Prezident Elton Məmmədovu təltif etdi
Azərbaycan prezidenti İlham Əliyev yeni sərəncam imzalayıb.
Azərbaycan Respublikasının ictimai-siyasi həyatında fəal iştirakına görə Elton Arzuman oğlu Məmmədov “Şöhrət” ordeni ilə təltif edilib.
Qeyd edək ki, Elton Məmmədov nəqliyyat naziri Ziya Məmmədovun qardaşıdır.
Azərbaycanda nurçuların məhkəməsi başladı
Bu gün Yasamal rayon məhkəməsində Azərbaycanda saxlanılan “Nurçu”ların cinayət işi üzrə növbəti məhkəmə prosesinin keçiriləcəyi gözlənilir.
Ölkə.Az anstv-yə istinadən xəbər verir ki, Səbail rayon məhkəməsinin qərarı ilə Eldəniz Hacıyev, İsmayıl Məmmədov və Rəvan Fərzəliyevin barəsində həbs- qətimkan tədbiri seçilib. Lakin sonradan onlar barəsində verilən qərar ev dustaqlığı ilə əvəzlənib.
Onlar dini ayinlərin icrası adi altında vətəndaşların hüquqlarına qəsd etmə maddəsi ilə təqsirli bilinirlər.
AMEA elmin "qocalması"nın səbəblərini açıqladı
İstər Azərbaycan Milli Elmlər Akademiyasında, istərsə də respublikanın başqa elmi-tədqiqat qurumlarında gənclər siyasəti elmi kollektivlərdə ciddi şəkildə müzakirə edilməli və bunun əsasında həm Akademiyaya, həm də bütövlükdə elmə gənc alimlərin cəlb edilməsi siyasətinin başlıca prinsipləri hazırlanmalıdır.
Bunu Azərbaycan Milli Elmlər Akademiyasının (AMEA) prezidenti, akademik Akif Əlizadə Azərbaycan Alimlərinin I Qurultayının açılışında çıxışı zamanı deyib.
Akademiyanın rəhbəri qeyd edib ki, Azərbaycanda çalışan 5000-dən artıq gənc alim və mütəxəssisin də üzərinə məsul vəzifələr düşür. Bu baxımdan gəncliyin müasir tələblərə cavab verən yüksəkixtisaslı kadr kimi yetişdirilməsi Azərbaycan elmi qarşısındakı əsas vəzifələrdəndir: "Azərbaycan elmində, o cümlədən Akademiyada mühüm problemlərdən biri də gənc mütəxəssislərin elmə cəlb edilməsidir. Özəl sektorda əməkhaqqı yüksək olduğundan fəal gənclər elmdən daha çox oraya meyil edirlər. Buna görə də gənclərin elmə axınını gücləndirmək üçün institutlarda imkanlar yaradılmalıdır ki, onlar əlavə maddi dəstək əldə edə bilsinlər. Gənc mütəxəssisin elmdə qalmaq qərarına təsir edən əsas səbəblər sırasında yeniliyin axtarışına maraq, aparılan tədqiqatların perspektivliyi, işlədiyi elmi kollektivin mənəvi ab-havası, müasir avadanlıqla təchiz edilməsi, beynəlxalq əməkdaşlıq imkanlarının olması durur".
Lütfi Zadə Azərbaycandan danışdı
“Bakıda çoxsaylı dostlarım və Azərbaycanın bacarıqlı rəhbərliyi var. Azərbaycan şanslıdır ki, rəhbərliyindəki şəxslər ağıllı və təşəbbüskardır”.
Ölkə.Az trend-ə istinadən xəbər verir ki, bunu ABŞ-da yaşayan dünya şöhrətli azərbaycanlı alim Lütfi Zadə Azərbaycan Alimlərinin I Qurultayının iştirakçılarına videomüraciətində deyib. Onun fikrincə, əsas məsələ rəqabətqabiliyyətliliyin artırılmasıdır: “Azərbaycanın gələcəyi ilə bağlı optimistəm. Azərbaycan və Azərbaycanın insanları həmişə qəlbimdə olacaqlar”.
Ziya Məmmədov Xaçmazda vətəndaşları qəbul etdi
Bəzi müraciətlər yerindəcə həll edilib.
Mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq dekabrın 19-da nəqliyyat naziri Ziya Məmmədov Xaçmaz şəhərində Xaçmaz, Quba və Qusar rayonlarından olan vətəndaşları qəbul edib.
Azərbaycanda terror qurbanlarına xüsusi status verilə bilər
Azərbaycanda terror qurbanlarına xüsusi statusun verilməsi nəzərdə tutulur.
Bu barədə Milli Məclisin Sosial siyasət komitəsinin bu gün keçirilən iclasında komitə sədri Hadı Rəcəbli bildirib.
İlham Əliyev idmançılara fəxri adlar verdi — SİYAHI
Azərbaycan prezidenti İlham Əliyev idman mütəxəssislərinə fəxri adların verilməsi haqqında sərəncam imzalayıb.
Azərbaycanda bədən tərbiyəsi və idmanın inkişafında xidmətlərinə görə aşağıdakı şəxslərə Azərbaycan Respublikasının fəxri adları verilib:
“Əməkdar Bədən Tərbiyəsi və İdman Xadimi”
Aliomarov Maqomed Aliomaroviç
Cəfərov Vaqif Məmmədəli oğlu
Həsənov Musa Süleyman oğlu
İsmayılov Çingiz Məmməd oğlu
“Əməkdar Müəllim”
Atakişiyev Akif Əli oğlu
Şahbazov Şəmsəddin İbrahim oğlu
Qadınlara hərbi bilet veriləcək
Azərbaycanda qadınlara da hərbi bilet veriləcək
Azərbaycanda öz razılığı ilə hərbi qeydiyyata götürülmüş 19 yaşdan 40 yaşadək qadınlara və ehtiyatda olan zabitlərə hərbi bilet veriləcək.
Parlamentdən verilən məlumata görə, Dekabrın 19-da Milli Məclisin Təhlükəsizlik və müdafiə komitəsinin iclasında “Hərbi vəzifə və hərbi xidmət haqqında” Azərbaycan Respublikasının qanununda dəyişikliklər edilməsi barədə” qanun layihəsinə baxılıb.
Hərbçilərimiz Türkiyəyə gedir
Tanışlıq ziyarəti keçiriləcək.
Azərbaycan Silahlı Qüvvələrinin nümayəndələri Türkiyədə keçiriləcək beynəlxalq tədbirdə iştirak edəcək.
Müdafiə Nazirliyindən Ölkə.Az-a verilən məlumata əsasən, hərbçilərimiz dekabrın 22-dən 28-dək Ankara şəhərində Türkiyə Silahlı Qüvvələrinin İdman Məktəbi və Təlim Mərkəzi Komandanlığının fəaliyyətləri ilə tanışlıq ziyarətinə qatılacaqlar.
Ölkə.az
