Elşad Miri Şeyxə cavab verdi: "QMİ ilk öncə öz daxilində birləşsin..."

Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə Həzrəti Məhəmməd Peyğəmbərin vəfatının ildönümü ilə bağlı bu gün QMİ-də keçirilən tədbirdə bildirib ki, biz İran və Türkiyə ilə birləşib kənar məzhəblərə, radikal qüvvələrə qarşı birgə mübarizə aparmalıyıq. Bunun vaxtı çoxdan çatıb.

Şeyxin bu fikrini ilahiyatçı alim Elşad Miri Ölkə.az-a şərh edib.

Elşad Miri: "Bu gün xristian dünyasına fikir verdiyimiz zaman görürük ki, Roma papası İstanbula gəlib ermənilərlə və digərləri ilə birləşmək kimi məsələləri gündəmə gətirir. Bununla bağlı səylər aparılır. Bu ərəfədə müsəlmanlar niyə birləşməsin ki? İslamın mahiyyəti, elə odur ki, müsəlmanlar hamısı bir olsun.

Türklərlə, iranlılarla necə birləşmək lazımdır? Biz müsəlman olaraq birik. Sadəcə olaraq bizi birləşdirən əsas ünsürlər nədirsə, onların üzərində iş aparmaq lazımdır.

Bu deyilənlər ümumi məsləhətlər, çıxışlardır. Bu məslələri konkretləşdirib bizi birləşdirən ümumi dəyərlər baxımından birlikdə hərəkət etməmiz daha yaxşı olar. Bu cür olmalıdır, yoxsa konkret məsələlər deyilməyəcək, ümumi "birləşək" deməklə olmur. İdeya gözəldir, ancaq ideyanın həyata keçirliməsi daha yaxşı olar. Bu gün faktiki olaraq Qafqaz Müsəlmanları İdarəsində dindarlar arasında birlik olmadığı halda müxtəlif ölkələrə "birləşək" deməyimiz çox gülüc çıxır".

Səxavət Məmməd
Ölkə.az