FHN Yeni illə bağlı əhaliyə xəbərdarlıq etdi

Təhlükəsizlik qaydalarına biganə olmayın!

Fövqəladə Hallar Nazirliyi (FHN) Yeni il bayramında yanğın təhlükəsizliyi tədbirləri ilə bağlı əhaliyə xəbərdarlıq edib.

Ölkə.Az-ın məlumatına görə, Nazirlik bildirib ki, hamı üçün əziz olan Yeni il bayramı ilə əlaqədar yanğın təhlükəsi xeyli artır. Bu səbəbdən, bəzi təhlükəsizlik qaydalarını hər birimiz bilməliyik:

• evlərdə və şənlik məkanlarında bəzədilən küknar ağacı yerə möhkəm bərkidilməli, budaqları tavana və divarlara toxunmamalıdır;
• küknar ağacını işıqlandırarkən yalnız standarta uyğun və saz vəziyyətdə olan elektrik qurğu və cihazlarından istifadə edilməlidir;
• ağacın oyuncaqları tezalışan olmamalı, pambığı isə odadavamlı məhlula hopdurulmalıdır;
• küknar ağacı olan otaqda atəşfəşanlıq edilməməlidir!

Həmçinin, bayram şənliklərində bunlar nəzərə alınmalıdır:

• şənliklər ikinci mərtəbədən yuxarıda olmayan otaqda keçirilməlidir;
• otağın divarları, arakəsmələri, tavan və döşəməsi oda davamlı olmalıdır;
• məkanın iki çıxış qapısı olmalıdır;
• ehtiyat qapı üzərində “Çıxış” sözü yazılmış yaşıl işıqlı elektrik lövhə olmalıdır;
• otağın qapıları mütləq bayıra açılmalıdır;
• dəmir barmaqlıqlı pəncərəsi olan otaqda Yeni il şənliyi keçirilməməlidir;
• şənlikdə məkan üçün nəzərdə tutulan saydan artıq insan olmamalıdır;
• şənlik zamanı işıq tam söndürülməməlidir;
• şənliyə pambıq, tənzif, kağız və bu cür tezalışan materialdan paltar geyinilməməlidir;
• şənlik məkanı ilkin yanğınsöndürmə vasitələri ilə təmin olunmalıdır.

Nazirlik əhalini qaydalara biganə olmamağa çağırıb və bildirib ki, hər hansı bir təhlükə zamanı vətəndaşlar “112”-yə zəng vura bilərlər.

Ölkə.Az