Politoloq: "Abutalıbov və Azad Rəhimov vəzifələrindən kənarlaşdırıla bilər"

Hesablama Palatası bu il dövlət büdcəsinin dövlət əsaslı vəsait qoyuluşu və ehtiyat fondlarından Bakı Şəhər İcra Hakimiyyətinə ayrılan, dövlət büdcəsinin mərkəzləşdirilmiş xərclərindən Gənclər və İdman Nazirliyinin aparatının saxlanmasına, “Azərbaycan Gəncliyi 2011-2015-illərdə” Dövlət Proqramı üzrə nəzərdə tutulmuş tədbirlərə ayrılan, dövlət büdcəsinin mərkəzləşdirilmiş xərclərindən Milli Arxiv İdarəsinə ayrılmış vəsaitlərin istifadəsinə dair yoxlamalar aparacaq.

Mövzu barədə Ölkə.az-a danışan politoloq Ərəstun Oruclu yoxlamaların nəticəsi olaraq sözügedən qurumların rəhbərliyinin dəyişməsi təhlükəsinin olduğunu bildirib.

"Hazırda söhbət Bakı şəhər İcra Hakimiyyətində, o cümlədən Gənclər və İdman Nazirliyində büdcə vəsaitlərinin xərclənməsinin yoxlanmasından gedir. Məsələyə toxunanda bir sual yaranır. Bu yoxlanmaların nəticəsi nə ola bilər? Nəticə ola bilər ki, hansısa büdcə vəsaitlərinin təyinatı üzrə xərclənməməsinə dair bu və ya digər qənaətlə cinayət işinin açılmaması şərti ilə ən sərt nəticə Bakı Şəhər İcra Hakimiyyəti başçısının, həmçinin Gənclər və İdman nazirinin vəzifəsindən kənarlaşdırılması ola bilər. Dediyim kimi bu ən sərt nəticədir. Yəni burada söhbət əsaslı dəyişiklikdən getmir, uzaq başı kadr dəyişikliyindən söhbət gedə bilər ki, bu da prinsip etibarı ilə heç nəyi dəyişmir".

Qeyd edək ki, kollegiya iclasında Hesablama Palatasının 2015-ci ilin İş Planı üzrə nəzərdə tutulmuş nəzarət tədbirləri ilə bağlı audit proqramları təsdiq edilib.

Fatimə İbrahimova
Ölkə.az