"Megafun"dakı icarədarlar qan ağlayır

Bakı sakinləri arasında məşhur olan ticarət və əyləncə mərkəzlərindən biri də "Megafun"dur.

Son zamanlar şəhər sakinləri və paytaxtımızın qonaqları arasında məşhur olan bu mərkəzdə apardığımız qısa araşdırmada əslində buranın necə işlədildiyi aydın oldu.

Üst mərtəbələrdəki uşaq və böyüklər üçün nəzərdə tutulmuş əyləncə bölmələrinin demək olar ki, hər gün camaatla aşıb-daşmasına baxmayaraq, aşağı mərtəbələrdəki geyim və suvenir mağazalarına ümumiyyətlə girən yoxdur. Mağazaların satıcıları ilə apardığımız söhbət zamanı məlum oldu ki, icarədarlar çox vaxt yüksək icarə haqqını öz ciblərindən ödəməli olurlar. Ticarət mərkəzinin adamla dolu olmasına baxmayaraq buradakı mağazalara demək olar ki, girən yoxdur.

Apardığımız araşdırma nəticəsində məlum oldu ki, "Megafun"da satılan geyim əşyalarının 90%-i Çin istehsalı olan ucuz sintetik mallardır. "Binə" və "Sədərək" ticarət mərkəzlərində 3-4 dəfə ucuz olan bu malların qiymətinin "Megafun"da belə baha olmasının səbəbi isə mağaza icarəsinin qiymətlərinin çox baha olmasıdır. Bir tərəfdən icarə haqqının çox baha olması, digər tərəfdən malların keyfiyyətinin aşağı olması nəticədə "Megafun"da yer icarəyə götürmüş iş adamlaqrının ziyana düşməsinə səbəb olur. İcarədarların dediyinə görə, buradakı əksər mağazf işlədənlər yerlərini itirməmək üçün məcburiyyətdən yer pulunu ödəmək üçün banklardan kredit götürüblər. Onlar həmçinin bildilər ki, "Megafun" rəhbərliyi icarə haqqını bir gün gecikdirən kimi mağazalarını elə həmin gün bağlayırlar.

Ticarət mərkəzində yerləşən kafe və yeməkxanaların da vəziyyəti ürəkaçan deyil. Kafe işlədənlər də "Megafun"un insanlarla qaynaşmasına baxmayaraq müştəri çatışmazlığından şikayət edirlər. Onlar da analoji problemlərlə üz-üzə qalıblar.

Ölkə.az