Təhqirə görə tanışını bıçaqlayan 65 yaşlı kişinin məhkəməsi

Bakı Ağır Cinayətlər Məhkəməsində tanışını təhqirə görə məktəbin həyətində bıçaqlayan şəxsin məhkəməsi başlayıb.

“Ölkə.Az”ın xəbərinə görə, cinayət məcəlləsinin 29.120-ci (qəsdən adam öldürməyə cəhd) maddəsi ilə təqsirləndirilən 65 yaşlı Musa Bağırovun məhkəməsinə hakim Əfqan Hacıyev sədrlik edir. Hazırlıq iclasında təqsirləndirilən şəxsin anket məlumatları dəqiqləşdirilib.

Xatırladaq ki, hadisə bu ilin fevral ayında Bakının Nəsimi rayonunun ərazisində baş verib. Rayon ərazisində yerləşən orta məktəblərdən birinin həyətində 1953-cü təvəllüdlü Musa Bağırov tanışı, 1981-ci il təvəllüdlü Vüsal Məhərrəmov ilə mübahisə edib.

Mübahisə zamanı Musa Bağırov Vüsal Məhərrəmova iki bıçaq zərbəsi vurub. Yaralı ağır vəziyyətdə xəstəxanaya yerləşdirilib. Məlum olub ki, bıçaqlar V.Məhərrəmovun ürək nahiyyəsinə dəyib.

Hadisəni törədən Musa Bağırov isə Nəsimi RPİ-nin əməkdaşları tərəfindən həbs edilib.

İlkin dindirmələr zamanı Musa Bağırov Vusal Məhərrəmovun onu təhqir etdiyinə görə bıçaqladığını bildirib.