Sabah keçiriləcək hərbi paradda 13 ölkənin nümayəndəsi iştirak edəcək

Sabah Bakıda keçiriləcək hərbi parada qatılacaq ölkələrin adı məlum olub.

"Ölkə.Az" xəbər verir ki, Müdafiə Nazirliyinin mətbuat xidmətindən bildirilib ki, 26 iyun - Azərbaycan ordusunun 100 illiyi münasibətilə Bakıda keçiriləcək təntənəli hərbi paradda Türkiyə, Pakistan, Belarus, Bəhreyn, BƏƏ, Gürcüstan, İran, İsrail, Qazaxısan, Özbəkistan, Rusiya, Səudiyyə Ərəbistanı və Ukraynadan nümayəndə heyətləri qonaq qismində iştirak edəcək.

Həmçinin hərbi paradda Müdafiə, Daxili İşlər, Fövqəladə Hallar nazirliklərinin, Dövlət Təhlükəsizliyi, Dövlət Sərhəd və Xüsusi Dövlət Mühafizə xidmətlərinin, eləcə də Türkiyə Respublikası Silahlı Qüvvələrinin parad heyətindən ibarət 4000 nəfərədək şəxsi heyət də iştirak edəcək.

Təntənəli mərasimdə 240-dan çox hərbi texnika, 70-dən artıq uçuş vasitəsi, o cümlədən silahlanmaya yeni qəbul edilmiş ən müasir zirehli texnikalar, raket və artilleriya qurğuları, hava hücumundan müdafiə sistemləri, helikopterlər, pilotsuz uçuş aparatları kimi müxtəlif növ ən yeni silah və texnikalar nümayiş olunacaq.