Bilik Fondunun Sabirabadda təşkil etdiyi mühazirə maraqla qarşılanıb

"Məktəbliləri maraqlandıran sualları cavablandırıb"

Ölkə.Az xəbər verir ki, Azərbaycan Respublikasının Prezidenti yanında Bilik Fondu növbəti mühazirəni Sabirabadda təşkil edib. Bakı Dövlət Universitetinin dosenti, filologiya üzrə fəlsəfə doktoru Sevinc Əliyeva Sabirabadda Mirzə Ələkbər Sabir adına 1 nömrəli tam orta məktəbdə "Uşaq hüquqlarının pozulması ailələrdən başlanır” movzusunda mühazirə deyib.

Tədbirdə Sabirabad Rayon İcra Hakimiyyətinin əməkdaşı Cavanşir Nəsirov, Bilik Fondunun Sabirabad rayonu üzrə nümayəndəsi Diləfruz Mustafayeva, rayonun müəllim kollektivinin üzvləri, valideynlər, yerli ziyalılar və rayonda yerləşən 9 orta ümumtəhsil məktəbin şagirdləri iştirak ediblər.

Mərhum prezident Heydər Əliyevin “Uşaqlar bizim gələcəyimizdir. Gələcəyimizi nə cür tərbiyə edəcəyiksə, böyüdəcəyiksə, ölkəmizin, millətimizin, dövlətimizin gələcəyi bundan asılı olacaqdır” sözlərini sitat gətirən dosent S.Əliyeva hazırda uşaq hüquqlarının müdafiəsinin dünyada ən aktual məsələlərdən birinə çevrildiyini vurğulayıb. O, iştirakçılara uşaqların sosial hüquqlarından, bu hüquqların təmin olunmasında ailənin və cəmiyyətin rolundan danışıb.

Diskussiya formasında davam edən görüşün sonunda mühazirəçi məktəbliləri maraqlandıran sualları cavablandırıb.

Rəşid Mustafazadə

Ölkə.Az