"Azərbaycanda jurnalistlərin çoxu yalançı xəbərlər verirlər"

"Çox istərdim ki, Azərbaycanda Həsən bəy Zərdabi, Molla Nəsrəddin, Cəlil Məmmədquluzadə ənənələri davam etdirilsin. İndi deyirlər ki, biz Azərbaycanda "CNN jurnalistikası" ilə məşğul oluruq, "Qərb jurnalistikası"na yaxınlaşırıq və sairə. Əslində isə Azərbaycan jurnalistlərinin əksəriyyəti yalançı xəbərlər verməklə məşğul olur".

Bu fikirləri "Ölkə.Az"a açıqlamasında Azərbaycan Sosial Demokrat Partiyasının (ASDP) sədri, Milli Məclisin deputatı Araz Əlizadə 22 iyul Milli Mətbuat Gününün yaranması ilə bağlı danışarkən bildirib.

A.Əlizadə iddia edib ki, Azərbaycan jurnalistlərinin əksəriyyəti şər-böhtan yazmaqla məşğuldur:

"Çox arzu edirəm ki, Azərbaycan mətbuatı əvvəlki vəziyyətinə qayıtsın. Bunun üçün də həqiqi mətbuata qayıtmaq lazımdır. Mənim bu fikirlərim Azərbaycanın əksər mətbuatına və ya jurnalistlərinə şamil etmək olar. Yüksək peşəkarlıq, vicdan, Vətənə məhəbbət jurnalistikanın əsasında dayanmalıdır. Əfsuslar olsun ki, Azərbaycan mətbuatının səviyyəsi gündən-günə daha da aşağı düşür. Jurnalistlərimizin hörməti o zaman artar ki, onlar həqiqəti yazsınlar, yalan yazmasınlar".

Deputat 22 iyul Milli Mətbuat Günü münasibətilə jurnalistləri də təbrik edib:

"Mən özüm də əmək fəaliyyətimə jurnalistika ilə başlamışam. Ona görə də mənim jurnalistlərə böyük hörmətim var".

Vasif Həsənli

Ölkə.Az