Politoloq: \"Sanksiya söhbəti mətbuatın özünəməxsus Şərhidir\"

Bir neçə gündür ki, ABŞ-ın Azərbaycana sanksiya tətbiq edəcəyi barədə məlumatlar yayılmaqdadır. Məlumatda hətta 31 azərbaycanlı məmura sanksiya tətbiq edilməsi xəbəri də yer almışdı.

Mövzu barədə Ölkə.az-a danışan politoloq Həsən Bayramoğlunun fikrincə, hər hansı bir sanksiyanın tətbiq olunması və ya kiminsə bu mövzuda düşünməsi yanlış qənaətdir.

"ABŞ ilə Azərbaycanın münasibətləri müttəfiq münasibətləri kimi səciyyələndirilir. Bu günlərdə Azərbaycan Prezident Administrasiyası rəhbəri və şöbə müdiri cənab Əli Həsənovun qeyd etdiyi kimi ABŞ Azərbaycan münasibətləri normal müttəfiq münasibətləri səviyyəsində inkişaf etməkdədir. Və Azərbaycan onunla bərabər hüquqlu tərəfdaş kimi öz milli maraqları çərçivəsində tərəfdaşlıq etməyə hazırdır və bu tərəfdaşlıq hazırda da davam edir. Ona görə də, hər hansı bir sanksiyanın tətbiq olunması və ya kiminsə bu mövzuda düşünməsi hesab edirəm ki, yanlış qənaətdir. Bunların hamısını mətbuatın özünəməxsus yorumlarından hesab etmək olar".

Xatırladaq ki, ABŞ-ın Azərbaycandakı səfirliyi tərəfindən 31 azərbaycanlı məmura sanksiya tətbiq edilməsi xəbərinə münasibətdə belə bir şeyin olmadığı bildirilmişdi.

Qeyd edək ki, Azərbaycan Prezident Administrasiyası rəhbərinin müavini, Xarici əlaqələr şöbəsinin müdiri Novruz Məmmədov Qərbdəki bəzi dairələrin Azərbaycana qarşı sanksiya tətbiq olunması barədə çağırışlarına münasibətində bu sözlərin deyilməsini ancaq Azərbaycana təzyiq etmək kimi şərh edib.

Fatimə İbrahimova
Ölkə.az