"Ölkə.Az" kollektivi Şəhidlər xiyabanını ziyarət etdi

Onlar Azərbaycanın ərazi bütövlüyü uğrunda canlarını fəda etmiş şəhidlərin qəbirlərini ziyarət edib.

Bu gün Qanlı Yanvar hadisələrindən 25 il keçir. 1990-cı il yanvarın 20-i Azərbaycanın müasir tarixinə ən faciəli günlərdən biri və xalqımızın qəhrəmanlıq səhifəsi kimi daxil olub.

Bu münasibətlə Ölkə.Az informasiya portalının redaksiya heyəti Ümumxalq hüzn günündə 20 Yanvar şəhidlərinin xatirəsini yad edib. Onlar Şəhidlər xiyabanına gələrək Azərbaycanın ərazi bütövlüyü uğrunda canlarını fəda etmiş şəhidlərin qəbirlərini ziyarət edib.

Ölkə.Az-ın əməkdaşları Qanlı Yanvar faciəsi qurbanlarının məzarları üzərinə qərənfillər qoyaraq öz ehtiramlarını bildiriblər.

Xatırladaq ki, yanvarın 19-dan 20-nə keçən gecə Mixail Qorbaçovun tapşırığı ilə Sovet ordusu fövqəladə hal bəhanəsi ilə tank, pulemyot və müxtəlif silahlarla dinc, silahsız əhali üzərinə hücum etmişdi. Sovet qoşunlarının Bakıya qanunsuz yeridilməsi nəticəsində 131 nəfər öldürülmüş, 744 nəfər yaralanmış, 841 nəfər isə qanunsuz həbs olunmuşdu.