Mətn ölçüsü:
  • 100%

DİQLAS ticarət mərkəzində qalmaqal: administrasiya reketliklə məşğuldur

Bakının Nizami rayonundakı 8 km bazarının qarşısında yerləşən DİQLAS ticarət mərkəzinin icarədarlarından Ölkə.az-a çox ilginc bir məlumat daxil olub.

Ticarət mərkəzindəki geyim əşyaları satılan ticarət nöqtələrini işlədən xırda sahibkarların verdiyi məlumata görə, bazar rəhbərliyinin göstərişi ilə onlara ucuz qadın geyimləri paylanıb və bu malların pulunu verməyənlərin bazardan çıxarılacağı bildirilib. Məlumata görə, geyimlər çoxdan anbarlarda qaldığından rəngini və keyfiyyətini itirib. Onları satmaq mümkün deyil. Sahibkarlara paylanan keyfiyyətsiz mala görə 500 manat pul tələb edilir. Deyilənə görə, hər paketdə 50-60 ədəd qadın paltarı var və onları hətta pulsuz paylasalar belə heç kəs onlara yaxın durmaz.

Sahibkarlar bazar administrasiyasının onlara bir həftə vaxt verdiyini, əgər deyilən məbləğ vaxtında çatmasa onların ticarət nöqtələrinin və mağazalarının bağlanacağını və özlərinin də ticarət mərkəzindən çıxarılacaqlarını bildiriblər.

Sahibkarların dediklərindən belə aydın olur ki, belə "reketlik" hərəkətləri DİQLAS administrasiyası tərəfindən ilk dəfədir edilmir. Hadisəni isə yalnız "mədəni soyğun kimi qiymətləndirmək olar.

Ölkə.az olaraq hadisəni diqqətdə saxlayırıq və oxucularımıza bu haqda daha ətraflı məlumat verəcəyik.

Ölkə.az, informasiya şöbəsi