Vasif Talıbov mükafatları təqdim etdi

Naxçıvan Muxtar Respublikası Ali Məclisində Azərbaycan Respublikasının “Dövlət qulluğunda fərqlənməyə görə” və “Hərbi xidmətlərə görə” medallarının, Naxçıvan Muxtar Respublikasının fəxri adlarının döş nişanlarının, 2013-2014-cü tədris ilində keçirilmiş “Ən yaxşı ümumtəhsil məktəbi” və “Ən yaxşı müəllim” müsabiqəsinin qaliblərinə mükafatların təqdimat mərasimi keçirilib.

Ölkə.Az azərtac-a istinadən xəbər verir ki, Ali Məclisin Sədri Vasif Talıbov təltif olunanları təbrik edib: “Hər bir insanda vəzifə borcu ilə yanaşı, onun Vətən qarşısında, cəmiyyət qarşısında daşıdığı borc hissi də olmalıdır. Vəzifələrini layiqincə yerinə yetirən, fədakarlıq göstərən belə insanlar daim öz fəaliyyətləri ilə nümunə göstərirlər. Çünki bu insanlar vəzifə borclarını yerinə yetirməklə yanaşı, həm də ölkəmizin inkişafına töhfə verirlər. Bu gün təltif olunanlar da çalışdıqları sahələrdə nümunəvi xidmətləri ilə seçilən insanlardır.

Sonra Ali Məclisin Sədri Azərbaycan Respublikasının medallarını və Naxçıvan Muxtar Respublikasının fəxri adlarının döş nişanlarını və vəsiqələrini təqdim edib.

Ölkə.Az