Hərbi ekspert: "Bu monitorinqdən heç nə gözləmirəm"

ATƏT-in fəaliyyətdə olan sədrinin şəxsi nümayəndəsinin mandatına uyğun olaraq bu gün Qazax rayonunun Məzəm kəndi yaxınlığındakı qoşunların təmas xəttində monitorinq keçiriləcək.

Ölkə.az-a təmas xəttində baş tutacaq monitorinq barədə danışan hərbi ekspert Azad İsazadənin fikrincə, bu sadəcə məlumat funksiyasını daşıyır.

"Bu monitorinqdən təəssüf ki, hər hansı bir gözləntilərim yoxdur. Bu sadəcə MİNSK qrupu, ATƏT və beynəlxalq qrumlar üçün neytral bir mövqedir. Onlara məlumat lazımdır və bu monitorinq həmin funksiyanı daşıyır.

Bu monitorinq həm də Ermənistan tərəfi üçün də maraqlıdır.

Ermənistan prezidenti Serj Sarkisyanın səsləndirdiyi bəyanatları nəzərə alsaq, görərik ki, onlar sadəcə "xox" gəlmədir. Çünki hərbi güc baxımından onların bu gün cəbhə bölgəsində nəyisə dəyişməyə gücü yoxdur.

Reallıq göstərir ki, avqustan bəri ermənilər vəziyyəti gərgin saxlasalar da, heç nəyə nail ola bilməyiblər.

Bir daha qeyd edim ki, bu dəfə də baş tutacaq monitorinqdən heç bir gözləntim yoxdur".

Qeyd edək ki, monitorinqi Azərbaycan tərəfdən ATƏT-in fəaliyyətdə olan sədrinin şəxsi nümayəndəsinin səhra köməkçiləri Jiri Aberle və Saymon Tiller keçirəcəklər.

Fatimə İbrahimova
Ölkə.az