Aysel Viento: "Bacıma oxşayan birini sevmək istəyərəm"

Uğurlu iş görmək istəyirsənsə, qurban verməyi bacarmalısan

Ölkə.Az-ın "Tanınmamış məşhurlar" layihəsinin buhəftəki qonağı daha çox Aysel Viento kimi tanınan Səriyyə İbrahimlidir.

Gəlin, əvvəlcə Ayselin bioqrafiyasına qısaca nəzər salaq.

Aysel Viento kimdir?

Aysel Viento: 19 yaşı var. Bakıda dünyaya gəlib. Həyatını yaradıcılığa həsr edib. Bakı Dövlət Universitetinin jurnalistika fakültəsinin tələbəsidir. Onun hədəfi uğurlu kinorejissor olmaqdır. Hazırda müxtəlif layihələr üzərində çalışır.

-Redaksiyamıza xoş gəlmisən, Aysel. İlk olaraq özünü bir neçə cümlə ilə izah et...

-Həvəskar fotoqraf ve aksesuar dizayneriyəm. Mənim üçün heç nəyin idealını arzulamaq yoxdur, əlimdə olanlar və bacardıqlarımla təkmilləşməyi sevirəm. Heç vaxt ən yaxşısını gözləmirəm. Çünki o zaman gec ola bilər.

Bir xətt üzərində işləmirəm. Çünki olduğum yerdə qalmaq mənə görə deyil. Daim yeniliklər axtarışındayam. Bunu gördüyüm işlərdə də sezmək mümkündür.

-Dərslərin necədir, semestri necə başa vurdun?

-6 kəsrlə (red. gülür). Mənim üçün dərslər ikinci planda dayanır. Daha çox yaradıcı işlərlə məşğul olmağı sevirəm. Uğurlu iş görmək istəyirsənsə, qurban verməyi bacarmalısan. Mən də universiteti deyil, yaradıcılıq işini seçdim. Jurnalistikanı da sevirəm, amma rejissorluq mənə jurnalistika ilə müqayisədə daha yaxındır.

Əslində, mən elə İncəsənət Universitetinə hazırlaşırdım, ancaq balımın çox olmasına görə, dedim daha əziyyətim boşa getməsin (red. gülür). Ona görə də jurnalistikanı seçdim. Çünki bu sahə də inkişafa meyilli sahədir.

-Dərslərlə şəxsi həyatın arasında tarazlıq yarada bilirsənmi?

-Qətiyyən tarazlıq yarada bilmirəm. Ona görə də, çox vaxt dərslərə getmirəm. Əsas çalışıram ki, universitetdən qovulmayım, vəssalam (red. gülür)

-Müasir təhsil sistemində başlıca bəyənmədiyin nədir?

-Təhsil sistemində bəyənmədiyim asas amil təhsilin dondurma prosesinin ağır olmasıdır. Bir də dərslərdə məcbur oturdulmağı anlamıram. Ola bilər ki, bir tələbə heç dərslərə girməyə bilər, amma bununla yanaşı da yaxşı nəticələr göstərə bilər. Qısacası, qayıb sistemi olmasa yaxşıdır.

-Hansı adət-ənənənəmiz səni sıxır?

-Mənim üçün adət ənənələrdən sıxılmaq, onları qəbul etməmək deyə bir şey yoxdur. Bilirsiniz, adət ənənələr hər bir xalqı özünəməxsus şəkildə təmsil edir. Ona görə də hər xalqın adət-ənənəsinə hörmət edirəm. Mentalitetimizə gəlincə, mənim üçün standartlar yoxdur. Kim özünü necə rahat hiss edirsə, elə də olmalıdır.

Bir növ geyim də bizim adətlərimiz sırasındadır. Geyimə gəlincə, o insanın azadlığıdır. Heç vaxt geyiminə görə insanları qınamıram.

Biz də geyimlərə münasibət iki cürdür. Açıq saçıq geyinən olanda ona əxlaqsız, fərqli tərzdə geyinən olanda isə xəstə kimi baxırlar. Ona görə də bəzən sıxılıram. Amma bu çox az halda olur.

-Hansı yaşı evlənmək üçün optimal hesab edirsən?

-Bütün gənc qızlar kimi mən də evlənməyi düşünmürəm (red. gülür). Hələ uşaq vaxtlarından mənim üçün evlənmək elə də əhəmiyyətli mövzu olmayıb. O vaxtdan mənim üçün evlənmək deyil, sadəcə övladın olması maraqlı idi. Həmişə övladım olsun istəmişəm. Düzdür, yolda azyaşlı uşaqlarla şirin davrana bilmirəm, amma öz övladıma olan hislər tamam başqa olacaq, buna əminəm.

Bizdə kasıb qadın atasız övlad dünyaya gətirərsə, əxlaqsız deyilir, bir az daha ətrafı insanlarla dolu olan qadın isə tənha ana olur. Bu düz deyil, evlənmək istəməyən və ya evliliyi alınmayan qadınlar rahatlıqla uşaq sahibi olmalıdır. Nəhayətində analıq instinktivi deyilen bir şey var, amma atalıq instinktivi yoxdur

-Ən çox nəyə pul xərcləyirsən

-Hazırda ən çox layihələrə pul xərcləyirəm, çünki bu mənim ən ali məqsədimdir. Eyni zamanda geyimlərə də az xərcləmirəm. Düzü, elə də bahalı geyimlər almıram. Heç vaxt almaram da demirəm, bəlkə nə vaxtsa pulum olsa alaram, hələ ki, bu yaşamadığım hisdir.

-Aysel Viento, yoxsa Səriyyə?

Məni 7-i yaşıma qədər Aysel deyə çağırıblar. Məktəbə gedəndə bilmişəm ki, sənəddə adım Səriyyədir. Bunun tarixçəsi isə belə olub. Mən doğulandan sonra məni hər kəsə Aysel kimi təqdim ediblər. Artıq hamı adımın Aysel olduğunu bilib. Sonra anidən mənə nənəmin adının qoyulması qərarına gəlinib. Və beləcə sənəddə adım Səriyyə olub. Ümumillikdə Səriyyə adı da mənə doğmadır. Adların ikiləşməsi qərarı qüvvəyə minsə, Səriyyə Aysel İbrahimli edəcəyəm.

-Aysel necə bəylərdən xoşlanır?

-Çox tez-tez aşiq oluram. Sərt üz cizgilərini sevirəm.

-Necə seçim etməyi düşünürsən?

-Mən nə vaxtsa, evlənmək, ya da evlənəcəyim günü xeyal etməmişəm. Əgər elə birini seçməli olsam, yəqin ki, bacıma bənzəyən birini seçərəm.

-İnsanların fikirlərinə nə dərəcədə önəm verirsən və bu fikirlər şəxsi fikirlərinə nə qədər təsir edir?

-Səhv başa düşülmə vəziyyətləri mənim başıma çox tez-tez gəlir. Həmişə də bu lap film səhnələrinə bənzəyir. Bilirsiniz, hər şeyin bir görünməyən tərəfi var. Kənardan gələn rəy nəsə öyrədə bilməyəcəksə çox mənasız və boş olur. Məncə, bunlara fikir verib, zaman itirmək, motivasiyanı öldürmək düzgün deyil.

-Ayselin ətrafına insanlar niyə toplaşır?

-Ətrafımda elə də çox insanlar yoxdur. Əslində çox azdır. Son layihəni hazırlayan zaman bəzi adamlara müraciət edəndə nəsə ümidsiz idim, ancaq onların mənə göstərdiyi diqqət gözlənilməz oldu və bu məni çox sevindirdi.

-Hazıda əsas məşğuliyyətin nədir?

-Əsas məşğuliyyətim Baku Street Fashion səhifəsi ilə bağlıdır. Aksessuarlar da hazırlayıram. Bir də yeni layihələr üzərində işləyirəm.

Sonda müsahibimizlə uğursuz layihələr barədə də danışırıq...

Uğursuz layihə yoxdur, layihəni uğursuzluğa aparan insanlar var. Mən heç vaxt başladığım layihələrə laqeyd yanaşmıram. Gələcəkdə “nude” fotolar üzərində işləməyi düşünürəm. Amma bunun uğurlu alınacağına əmin olaramsa. Buna görə də düşünürəm ki, bu cür layihəyə başlayaramsa, ancaq öz rəhbərliyimlə olacaq. Çünki uğursuz layihələrlə işləmək mənə görə deyil.

Budur, layihəmizin bu həftəki qonağı ilə söhbətimiz beləcə başa çatdı. Unutmayın ki, "Tanınmamış məşhurların" qonağı siz də ola bilərsiniz.