AAH-nın növbəti konqresı keçriləcək

Ramin Hacılının səlahiyyət müddəti başa çatdı.

18 fevral 2015-ci il tarixində Azərbaycan Avropa Hərəkatının III Konqresi keçiriləcək. Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə hərəkat növbəti seçkilərini keçirir. Saat 15:00-da başlayacaq Konqresdə hərəkatın prezidenti, İdarə Heyəti üzvələri, vitse prezidentlər və Nəzarət Təftiş Komissiyası üzvləri seçiləcək. Beynəlxalq Mətbuat Mərkəzində baş tutacaq tədbirdə hərəkatın bundan sonrakı fəaliyyət istiqamətləri, Nizamnaməsinə dəyişikliklərlə bağlı məsələlər də müzakirəyə çıxarılacaq.

Saat 17:00-dək davam edəcək Konqresdə beynəlxalq qurumların, səfirliklərin, ictimai və siyasi təşkilatların nümayəndələri, o cümlədən dövlət təmsilçiləri, ictimai xadimlər, KİV, hərəkat üzvləri iştirak edəcək.

Qeyd edək ki, 2012-ci ilin 17 fevral tarixində ilk Konqresini keçirən hərəkatın 41 nəfərdən ibarət təşəbbüs qrupu, 3 il müddətinə qurumun rəhbər orqanlarını seçmişdi. Azərbaycan Avropa Hərəkatı (AAH) 2012-ci ilin sentyabr ayında Beynəlxalq Avropa Hərəkatına (BAH) tamhüquqlu üzv kimi qəbul edilib. Həmin ilin iyun ayında isə Azərbaycan Respublikası Ədliyyə Nazirliyi tərəfindən dövlət qeydiyyatına alınıb.

Siyasətçi Ramin Hacılın başçılıq etdiyi qurum ATƏT-in Bakı ofisinin maliyyə dəstəyi ilə Azərbaycanın 14 regionunda öz klublarını yaradıb. Müntəzəm olaraq Azərbaycanda Avropa dəyərlərinin təbliği istiqamətində fəaliyyət göstərən hərəkatın başlıca məqsədi Avrointeqrasiya prosesinə dəstək verməkdir. Bu istiqamətdə yerli və beynəlxalq fondlarla sıx əməkdaşlıq edən hərəkatın rəhbərliyi üç ildən bir yenidən seçilir.