Avropa Hərəkatı yenidən formalaşdı

İdarə Heyətinə kimlər düşdü?

18 fevral 2015-ci il tarixində Azərbaycan Avropa Hərəkatının III Konqresi keçirilib. Konqresdə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə baş tutub. Saat 15:00-da öz işinə başlayan Konqresdə hərəkatın prezidenti, İdarə Heyəti üzvləri, vitse prezidentlər və Nəzarət Təftiş Komissiyası üzvləri seçilib. Beynəlxalq Mətbuat Mərkəzində baş tutan tədbirdə hərəkatın bundan sonrakı fəaliyyət istiqamətlərin bəyan edilib, Nizamnaməsinə dəyişikliklərə də baxılıb. Konqresdə beynəlxalq qurumların, səfirliklərin, ictimai və siyasi təşkilatların nümayəndələri, o cümlədən dövlət təmsilçiləri, ictimai xadimlər, KİV, hərəkat üzvləri iştirak edib.

Seçkilərin nəticələrinə görə Ramin Hacılı prezident, Leyla Məmmədli, Mərdan Əfəndiyev, Sevinc Hacızadə vitse prezident, Xalisə Şahverdi, Orxan Quliyev (Odər), Tural Abbasov, Tamilla Məmmədova (Qulami), Tural Tağıyev, Qüdsiyyə Məmmədova, Günel Səfərova, Vüqar Əhmədov, Nərgiz Eyvazova, Leyla İsrafilov, Orxan Məmmədli, Toğrul Tağızadə, Məcid Musayev, Əfsanə Ələsgərli, İdarə Heyətinin üzvü, Babək Əliyev, Səbinə Tahirova, Cavid Əliyev Nəzarət Təftiş Komissiyası üzvü seçilib.

Qeyd edək ki, 2012-ci ilin 17 fevral tarixində ilk Konqresini keçirən hərəkatın 41 nəfərdən ibarət təşəbbüs qrupu, 3 il müddətinə qurumun rəhbər orqanlarını seçmişdi. Azərbaycan Avropa Hərəkatı (AAH) 2012-ci ilin sentyabr ayında Beynəlxalq Avropa Hərəkatına (BAH) tamhüquqlu üzv kimi qəbul edilib. Həmin ilin iyun ayında isə Azərbaycan Respublikası Ədliyyə Nazirliyi tərəfindən dövlət qeydiyyatına alınıb. ATƏT-in Bakı ofisinin maliyyə dəstəyi ilə Azərbaycanın 14 regionunda öz klublarını yaradıb. Müntəzəm olaraq Azərbaycanda Avropa dəyərlərinin təbliği istiqamətində fəaliyyət göstərən hərəkatın başlıca məqsədi Avrointeqrasiya prosesinə dəstək verməkdir. Bu istiqamətdə yerli və beynəlxalq fondlarla sıx əməkdaşlıq edən hərəkatın rəhbərliyi üç ildən bir yenidən seçilirdi. Son Konqresdə verilən qərara görə seçkilər iki ildən bir keçiriləcək.

Ölkə.az