Qubad İbadoğlu: "Baş verən hadisələrin Avropa Oyunları ilə heç bir əlaqəsi yoxdur"

"Yaşayış standartları aşağı düşəcək, sosial göstəricilər pisləşəcək, əhali və hökümət arasında sosial münasibətlər gərginləşəcək".

"Baş verənlərin Avropa Oyunları ilə əlaqələndirilməsinin tərəfdarı deyiləm"

Bu sözləri Ölkə.az-a danışan Azərbaycan Demokratiya və Rifah (ADR) hərəkatının sədri Qubad Ibadoğlu deyib.

"Mən baş verənlərin Avropa Oyunları ilə əlaqələndirilməsinin tərəfdarı deyiləm. Hesab edirəm ki, Avropa Oyunları ərəfəsində son hadisələr daha çox bahalaşmaya gətirib çıxardacaq. Və bu ölkəyə gələn xaricilərin də xərclərinə təsir edəcək.

Proqnozlara görə dünya bazarında neftin qiymətinin enməsi ilin ikinci yarısına qədər davam edəcək. Ola bilər ki, bu proqnozlar da məhz ona görə Avropa Oyunları ilə əlaqələndirilir. Bütün bunlar isə dünya bazarındakı neftin qiymətindən asılıdır".

İqtisadçı ekspert ərzaq məhsullarının qiymətində baş verən süni artımlardan da danışdı.

"Manatın ucuzlaşması fonunda dolların bahalaşması ilk növbədə idxal olunan əsas yeyinti məhsullarının (bitki və heyvan mənşəli piylər və yağların, süd məhsullarının, ətin, şəkərin), dərman və digər əzcacılıq mallarının, eləcə də tütün və tütün məmulatlarının, spirtli içkilərin, avtomobillərin, məişət texnikası, mebelin və onun hissələrinin, sonrakı mərhələdə isə çörəyin və digər un məmulatlarının qiymətində 1,5 - dən 2 dəfəyədək bahalaşma gözlənilir.

Bu isə bu il ərzində inflyasiyanın Mərkəz Bankın hədəflədiyindən 2-3 dəfə yüksək olacağını proqnozlaşdırmağa imkan verir. Bunu hiss edəcək istehlakçılar özlərinə ehtiyat yaratmaq üçün mağazalardan daha çox ərzaq almağa çalışacaqlar".

- Bəs bütün bu proseslərin nəticəsi necə olacaq?

- Bütün bu proseslərin nəticəsində yaşayış standartları aşağı düşəcək, sosial göstəricilər pisləşəcək, əhali və hökümət arasında sosial münasibətlər gərginləşəcək.

Fatimə İbrahimova

Ölkə.az