İlahiyyatçı: \"Din, ölüm məsələlərinə biznes tərəfdən yanaşılmamalıdır\"

"Dinimizdə özəl qəbiristanlıqla bağlı heç nə yoxdur"

"Din, ölüm məsələlərinə biznes tərəfdən yanaşılmamalıdır".

Bu sözləri Ölkə.az-a danışan ilahiyyatçı Elşad Miri paytaxda fəaliyyət göstərən özəl qəbiristanlıqların fəaliyyətini qiymətləndirərkən deyib.

"Dinimizdə özəl qəbiristanlıqla bağlı heç nə yoxdur. Bu gün Həccə gedən insanlar əgər həmin ərazilərdə vəfat edərlərsə, onların cəsədləri ölkələrinə geri qaytarılmır. Harada vəfat ediblərsə, elə orada da dəfn edilirlər. Ancaq azərbaycanlılar buna tam fərqli reaksiya verirlər.

Məsələnin digər tərəfi də var. Təsəvvür edin ki, bir insan dəfn edildi və onu övladları müəyyən vaxtlarda ziyarət edir. Ölmüş bir insanı ən çox övladı, ardınca nisbətən nəvəsi ziyarət edir. Nəticələr isə çox az hallarda, bəzən isə ümumiyyətlə ziyarət etmir. O zaman belə sual yaranır. Bəs bu qəbirlərin aqibəti necə olmalıdır? Sırf bu səbəbdən özəl qəbiristanlıqların olmasının əleyhinəyəm. Din, ölüm məsələlərinə biznes tərəfdən yanaşılmamalıdır.

Digər ölkələrdə olduğu kimi bu məsələlərlə bələdiyyələr məşğul olmalıdır. Sözügedən torpaq sahələri bələdiyyələrin tərkibinə qatılmalıdır. Dinizmizdə rayonda öləni Bakıya gətirmək kimi inanc yoxdur. Bizdə isə insanlar bəzən yanlışlığa yol verirlər".

Qeyd edək ki, Məhəmməd peyğəmbər Məkkədə doğulub böyüsə də, Mədinədə vəfat etdiyinə görə elə burada da dəfn edilib.

Fatimə İbrahimova
Ölkə.az