Gürcüstandan Azərbaycana ixracın həcmi azalıb

Qruzstat yanvar ayı üçün məlumatı açıqlayıb.

2014-cü ilin yanvarı ilə müqayisədə 2015-ci ilin yanvarında Gürcüstandan Azərbaycana ixracın həcmi 23% (8,6 milyon dollar) azalaraq 28,5 milyon dollardan ibarət olub. Bu isə Gürcüstanın ümumi ixracının 18,2%-idir.

Gürcüstan KİV-nə istinadən xəbər verir ki, bu barədə Gürcüstanın Milli statistika xidməti “Sakstat” (Qruzstat) bildirib.

2015-ci ilin yanvarında Gürcüstandan Azərbaycana 13,7 milyon dollarlıq minik avtomobili ixrac edilib, bu isə 2014-cü ilin yanvar ayı ilə müqayisədə 6,7 milyon dollar azdır. Hesabat dövrü üçün Azərbaycana 4 milyon dollarlıq armatur gətirilib, bu isə 2014-cü ilin yanvar ayı üçün olan məbləğdən 1,4 milyon dollar çoxdur.

Hesabat dövrü ərzində Azərbaycandan Gürcüstana olan idxalın həcminin azalması qeydə alınıb. 2014-cü ilin yanvar ayı ilə müqayisədə 2015-ci ilin yanvar ayı üçün Azərbaycandan Gürcüstana olan idxalın həcmi 2% azalaraq 51 milyon dollardan ibarət olub, bu isə Gürcüstana olan idxalın 9,4%-idir.

Hesabat dövrü ərzində elektroenerjinin idxalı 3,3 milyon dollardan ibarət olub, 2014-cü ilin yanvar ayında bu mal idxal edilməyib.

Neft qazlarının və təbii qazın idxalı bu dövr üçün 57 min ton, 35,7 milyon dollar məbləğindədir, bu isə 2014-cü ilin yanvar ayı üçün olan məbləğdən 7,5 milyon dollar azdır. Hesabat dövrü üçün Azərbaycandan Gürcüstana 6,7 milyon dollar məbləğində 764 ton neft və neft malları göndərilib, bu isə 2014-cü ilin yanvar ayı üçün olan göstəricidən 4,1 milyon dollar artıqdır.

Hesabat dövrü ərzində Azərbaycan Gürcüstanın əsas ticarət tərəfdaşları arasında ikinci yeri tutur. Gürcüstanın Azərbaycan ilə xarici ticarət dövriyyəsi 2015-ci ilin yanvar ayı üçün 79 milyon dollardan çox olub, bu isə 2014-cü ilin yanvar ayı üçün olan göstəricidən 11% azdır. Azərbaycan ilə ticarət dövriyyəsi, Gürcüstanın ümumi xarici ticarət dövriyyəsinin 11,4%-idir.(oxu.az)

Ölkə.az