ADP sədr müavini: "Azərbaycanın təhlükəsizliyinə qarşı təhdidlər mövcuddur"

"Dövlətin təhlükəsizlik orqanları ayıq-sayıqlığını daha da artırmalıdır"

"Terrordan heç bir dövlət, heç bir şəxs sığortalanmayıb. Çünki terrorun harada və kimə qarşı yönələcəyini qabaqcadan bilmək olduqca çətindir. Bu baxımdan MNT-nin dünən keçirdiyi əməliyyat təqdir olunmalıdır. Çünki, ölkədə təxribatlar törədə biləcək bu tipli silahlı qrupların vaxtında aşkar edilməsi dövlətin təhlükəsizliyinə məsul olan orqanlardan peşəkarlıq və ayıq-sayıqlıq tələb edir".

Bu sözləri Ölkə.Az-a danışan ADP sədr müavini Taliyət Əliyev MTN-nin dünən keçirdiyi antiterror əməliyyatını şərh edərkən deyib.

"Bildiyiniz kimi MNT-nin dünən keçirdiyi əməliyyat birinci hal deyil. Bu tipli əməliyyatları son dövrlər çox eşidirik. Bu hallar da onu göstərir ki, Azərbaycanın təhlükəsizliyinə qarşı təhdidlər mövcuddur və bundan sığortalanmamışıq. Azərbaycan geopolitik maraqların toqquşduğu coğrafi məkanda yerləşdiyinə görə bu cür təhlükələr həmişə olub və olacaq. Regionda baş verən hadisələri də nəzərə alsaq bu cür hadisələrin baş vermə riski daha yüksəkdir. Üstəgəl qarşıdan gələn Yay Avropa Oyunları.

Azərbaycanı sevməyən xarici qüvvələr belə bir məqamda aktivləşə bilər. Ona görə də dövlətin təhlükəsizlik orqanları ayıq-sayıqlığını daha da artırmalıdır. Hesab edirəm ki, belə bir həssas dönəmdə təkcə hakimiyyət orqanları deyil, vətəndaşların özləri də ayıq-sayıq olmalı, bu cür təhlükələrin önləməsində dövlət orqanlarına köməklik göstərməlidirlər.
Qeyd edək ki, dünən MTN-nin həyata keçirdiyi antiterror əməliyyatı nəticəsində Azərbaycan Respublikasında terrorçuluğa hazırlıq və digər ağır cinayətlərin törədilməsində şübhəli bilinən 6 nəfər saxlanılıb. Onların üzərindən 4 ədəd “Makarov” tipli tapança, 1 ədəd “TT” tipli tapança, 5 ədəd tapança darağı, 35 ədəd patron, 1 kiloqrama yaxın trotil şaşkası, 2 ədəd “RQD-5” tipli əl qumbarası aşkar edilib.

Fatimə İbrahimova
Ölkə.Az