İlahiyyatçı: "Həcc ziyarətinin təşkili şirkətlərə həvalə edilməlidir"

"Qafqaz Müsəlmanları İdarəsi bu səfəri təşkil etmək üçün şirkətlərə imkan yaratmalıdır"

"Həcc ziyarətinə getmək istəyənlər bunu Allahın bir əmri olaraq yerinə yetirsələr də, səfəri təşkil edənlər bunu biznes olaraq görürlər. Azərbaycanda bu gün həccə getmək 5750 manata, Türkiyədə isə bu bizim pulla 3700 manata başa gəlir. Aradakı fərq isə olduqca yüksəkdir. Bu isə bunun biznes olduğunu bir daha təsdiq edir".

Bu sözləri Ölkə.az-a ilahiyyatçı Elşad Miri deyib.

"Türkiyədə bu işləri müəyyən şirkətlər həyata keçirir. Həmin şirkətlər bundan xeyir götürsələr də, insanların ibadətləri üçün ucuz qiymətə yaxşı şərait yaradırlar. Amma əfsuslar olsun ki, bizdə bu belə deyil. Qafqaz Müsəlmanları İdarəsi bu səfəri təşkil etmək üçün şirkətlərə imkan yaratmalıdır. Ancaq bu iş şirkətlərə həvalə edilmir. Əgər belə olarsa, zəvvarlar Məkkəyə daha rahat və ucuz qiymətlərə səfər edə bilərlər".

Qeyd edək ki, hazırda Azərbaycanda Həcc ziyarətinə səfərləri yalnız Qafqaz Müsəlmanları İdarəsin təşkil edir..

Fatimə İbrahimova
Ölkə.az