Rektor qızı onu döyənlər barədə: “Onlar mənim çox yaxın insanlarımdır”
Bu video bizim şirkətimizin marketoloqları tərəfindən hazırlanmış ssennari üzrə çəkilməli idi...
Xəzər Universitetinin rektoru Hamlet İsaxanlının qızı Ülkər İsayeva döyülməsi ilə bağlı xəbərlərə növbəti dəfə reaksiya verib.
Ölkə.Az Lent.az-a istinadən xəbər verir ki, o, “facebook” sosial şəbəkəsində belə bir status yazıb: “Əziz dostlarım və "dostlarım", hörmətli adekvat və qeyri-adekvat pressa işçiləri, heç nədən xəbəri olmayaraq, pressada verilən informasiyanın nə dərəcədə düzgün olub-olmadığını bilməyərək, ağzını qara açan millətə üz tutub demək istəyirəm ki, həmin videonun mənə və ailəmə heç bir aidiyyatı yoxdur. Mən heç kim tərəfindən döyülməmişəm. Mənə dəstəyini göstərən bütün tanıdığım və tanımadığım insanlara dərin təşəkkürümü bildirirəm. Yaxşı ki varsınız”.
O, şərhlərə reaksiya verərək, onu döyməkdə ittiham olunan Zaur və Elin Məmmədovlarla heç bir problemi olmadığını da qeyd edib: “Onlar mənim çox yaxın insanlarımdır”.
Məsələyə müdaxilə edən müğənni Nigar Camalın da şərhləri diqqət çəkib. O, bu məsələni müzakirə edənləri və medianı təhqir edib, Ülkər İsayevaya dəstək olduğunu bildirib.
Şərhçilərdən bir i- Elvin Əliyev isə qeyd edib ki, Ülkər İsayeva psixologiya müəllimidir və bu sahədə çox işlər görüb: “Bu video bizim şirkətimizin marketoloqları tərəfindən hazırlanmış ssennari üzrə çəkilməli idi. Əslində videoda gördüyünüz məşq prosesi idi. Kimsə bu layihədən xəbər tutub və icazəsiz çəkiliş edib. Videoda iştirak edəcək aktyorlar və rejissor həmin videoda iştirak edirlər. Bu layihə cəmiyyətdə "Qadın zorakılığına qarşı" hazırlanıb. Bu yaxınlarda hamıya KİV vasitəsilə təqdim ediləcəkdir”.
Qeyd edək ki, hadisə barədə Ülkər İsayevanın Elin və Zaur Məmmədov qardaşları tərəfindən döyüldüyü kameraya qeyd edilib. Bu məlumatı Baş Prokurorluq da təsdiqləyib. Prokurorluq Xəzər Universitetinin təsisçisi Hamlet İsaxanlının qızı Ülkər İsayevanın döyülməsində təqsirləndirilən şəxslərlə bağlı apellyasiya protesti verib.
Bunu açıqlamasında Baş Prokurorluğun mətbuat xidmətinin rəhbəri Eldar Sultanov deyib. O bildirib ki, apellyasiya protesti Bakı şəhər Prokurorluğu tərəfindən Xətai rayon Məhkəməsinin çıxardığı qərara qarşı verilib və həmin protestə bu gün saat 17:00-da Bakı Apellyasiya Məhkəməsində baxılıb.
Proses sabaha qədər təxirə salınıb.
Bu gün Məmmədov qardaşlarının anası Gülnarə Məmmədova isə Ülkər İsayeva adında qadın tanımadığını, rektor qızının döyüldüyü “Bentley”in isə oğlanları tərəfindən kirayələndiyini deyib.
Ölkə.Az
