Xidmət rəisi işəgötürənləri diqqətli olmağa çağırdı

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti (DƏMX) tərəfindən 28 Aprel - Ümumdünya Əməyin Mühafizəsi günü ilə əlaqədar 2015-ci ilin aprel ayı Azərbaycanda “Təhlükəsiz iş aylığı” elan olunub.

Ölkə.Az-a bu barədə Əmək və Əhalinin Sosial Müdafiəsi Nazirliyindən məlumat verilib.

DƏMX-nin rəisi Fuad Əlizadə aprel ayında “Təhlükəsiz iş aylığı” elan edilməsinin səbəblərinə də toxunub:

“İşçilər üçün sağlam və təhlükəsiz əmək şəraitinin yaradılmasına nail olunması, istehsalatda bədbəxt hadisələrin qarşısının alınması üçün qabaqlayıcı tədbirlərin görülməsi və əməyin mühafizəsi sahəsində mövcud nöqsanların aradan qaldırılmasının təmin edilməsi əsas səbəblərdəndir”.

Xidmət rəisi bildirib ki, bununla əlaqəli rayonlarda silsilə tədbirlər davam etdiriləcək.

“Bununla yanaşı, istehsalat qəzası riski yüksək olan müəssisələrdə, xüsusən də mişar daşlarının istehsalı sahələrində (daş karxanalarında) əmək qanunvericiliyinə, texniki təhlükəsizlik qaydalarına əməl olunması vəziyyətinin öyrənilməsi üçün sosial tərəfdaşların, aidiyyəti dövlət qurumlarının nümayəndələrinin iştirakı ilə dövlət nəzarəti tədbirlərinin həyata keçirilməsi nəzərdə tutulur. Nəticədə aşkar edilən nöqsanların aradan qaldırılması üçün müvafiq tədbirlər görüləcək” - deyə, Fuad Əlizadə bildirib.

Onun sözlərinə görə, bu tədbirlər vasitəsilə işəgötürənlərin, eləcə də işçilərin, ümumən cəmiyyətin diqqətinin əməyin təhlükəsizliyi problemlərinin ciddiliyinə cəlb edilməsi nəzərdə tutulur.

Ölkə.Az