Xəstəxanada verilən ölüm vizası

Normalda insanlar xəstəxanaya sağalmaq üçün getməlidirlər.

Amma bizdə isə son anda həkim, xəstəxana yada düşür. Çünki insanlar səhiyyəmizə güvənmirlər. Özlərini evdə türkəçarə şəkildə müalicə edirlər, həkimə getmirlər. Məncə haqsız da deyillər...

Həkimlərimiz vətəndaşlara xəstə gözü ilə deyil biznes, ticarət vasitəsi kimi baxırlar. Ancaq qazanc olsun. Bəli ölkəmizdə normal səhiyyə sistemi yoxdur. Vətəndaşların tibbi sığortası yoxdur. Amma bir çox həkimlərimizin də vicdanı yoxdur. Sən həkim, rüşvətlə aldığın diplomla insan həyatını riskə atıb, onu müalicə etmək adı ilə pul qazanmaq istəyirsən. Axı bacarmadığın işə niyə qol qoyursan?! Bu insan həyatıdır, oyuncaq deyil. Bir neçə gün öncə yenə xəstəxanalarımızın birində həkim məsuliyyətsizliyindən qadın doğuş zamanı dünyasını dəyişdi. Xəstəxananın adı Gəncə şəhər 1 saylı Abbas Səhhət adına doğum evi idi.

Bəlkə də həkim tapılıb, məsuliyyətə cəlb ediləcək. Amma o ana geri dönməyəcək. Uşaq anasız yaşayacaq. Neçə-neçə vətəndaşlarımız yenə həkim məsuliyyətsizliyindən öləcək. Bu vəziyyətə bir dur deyən tapılmalıdır. Səhiyyəmiz hara gedir?! Xəstəxanalarımız ölüm vizasını paylamaqla məşğul olur....

Ölkə.az