"Beynəlxalq hüquq müstəvisində soyqırım anlayışı" mövzusunda konfrans keçirildi

Təkliflər irəli sürülüb.

Ölkə.Az xəbər verir ki, martın 30-u Azərbaycanda Atatürk Mərkəzində “Oğuz” Müstəqil Araşdırmaçılar Qrupu və Türkdilli Gənclər Birliyinin təşkil etdiyi “Beynəlxalq hüquq müstəvisində soyqırım anlayışı” Elmi-Praktiki Konfransı keçirilib.

Konfransın moderatoru, Türkdilli Gənclər Birliyinin sədri Sahil Hacıyev hər kəsi salamlayaraq tədbiri açıq elan edib.

Konfransda Bakı Dövlət Universitetinin hüquq fakültəsinin müəllimi, hüquq üzrə fəlsəfə doktoru Daşqın Qənbərovun "Beynəlxalq hüquq müstəvisində soyqrım anlayışı", Azərbaycan Dövlət Pedoqoji Universitetinin müəllimi, "OĞUZ" MAQ eksperti Taleh Cəfərovun "Erməni diasporunun qondarma erməni soyqrımını tanıtmaq istiqamətində fəaliyyəti", Bakı Dövlət Universitetinin baş elmi işçisi, Alban-Udi Xristian İcmasının sədri Robert Mobillinin "Soyqrıma məruz qalmış mədəni irs" və AMEA-nın İnsan hüquqları institunun baş elmi işçisi, Gürcüstan yəhudiləri icmasının sədri Moisey Bekkerin "Yəhudi soyqrımında Türkiyənin xilas rolu" mövzularında məruzələri dinlənilib.

BDU-nun Beynəlxalq jurnalistika kafedrasının dosenti, "OĞUZ" Müstəqil Araşdırmaçılar Qrupunun rəhbəri Vüqar Zifəroğlu informasiya müharibəsi və erməni təbliğatına qarşı adekvat addımların atılması mövzusunda çıxış edib.

Yekun olaraq konfransda aşağıdakı təkliflər irəli sürülüb:

1. Bakıda 31 mart qurbanlarının xatirəsinin əbədiləşdirilməsi məqsədilə soyqırım memorial kompleksinin yaradılması.

2. 31 Mart soyqırımını özündə əks etdirən soyqırım muzeyinin yaradılması.

3. 31 Mart soyqırımının dünyada tanıdılması istiqamətində komissiyanin yaradılması.

4. 31 Mart hadisələrini özündə əks etdirən arxiv sənədlərinin kitab şəklində çap edilməsi və müxtəlif dillərə tərcümə edilməsi.

Konfransın sonunda mütəxəssislər gənclərin suallarını cavablandırıblar.