Təbriz Mirzəyev: \"Ateist xanımla münasibət qurmaq istəyərdim\"

" Fikrimcə, ölkədə heç kim özünə belə inanmır "

Ölkə.Az-ın "Tanınmamış məşhurlar" layihəsinin bu həftəki qonağı siyasi arena da məhşur hesab olunan gənc fəal Təbriz Mirzəyevdir.

Gəlin, əvvəlcə Təbrizin bioqrafiyasına qısaca nəzər salaq.

Təbriz Mirzəyev: Azərbaycan Texniki Universitetinin məzunudur. 4 ildir ki, siyasi fəaliyyət göstərir. İlk siyasi fəaliyyətinə AXCP sıralarında başlayıb. İndiyədək 3 partiyanın ( AXCP, GAP, VHP) üzvü olub. Qeyd edim ki, müsahibim bir müddət həm də jurnalist fəaliyyəti ilə məşğul olub. İçkini çox sevir. İnsanların xoşlamadıqları mövzuları müzakirə etmək hobbisidir.
Ömrünü sonunadək bir qadınla idarə etməyi düşünmür, qara rəngi sevir. Həyatının geri qalanını müxtəlif ölkələrdə yaşamağı düşünür.

-Təbriz kimdir?

-Özünün fərqində olan biri.

-Hədəfi nədir?

Fövqəlinsan olmaq.

-Təbriz, gənclər içində məşhur olmana səbəb nədir?

-Məhşur olma səbəblərimdən ən əsası bəlkə də zamanında bir çox partiya dəyişməyimdə və bu partiyaların hamısında rəhbərlikdə təmsil olunmağımda olub. Ümumiyyətlə, dəyişiklik inkişafdır prinsipi ilə yaşayıram, ətrafımda olan insanları, tanışları da tez-tez dəyişməyi xoşlayıram. “Mənim üçün önəmli olan insanın öz prinsiplərinə sadiq qalmağıdır, hansısa quruma, şəxsə sadiq qalmağı yox. Hətta qadınlarla münasibətə də elə yaşanaşıram, məncə, insan həyatı boyu bir qadınla yaşaya bilməz, sərbəst, adrenalin həvəskarı qadınlara üstünlük verirəm, monoton həyat istənilən mövzuda sıxıcı gəlir mənə.

-Seçəcəyin xanımda ən çox nəyə üstünlük verəcəksən?

-Fikrimcə, insan sevəcəyi, sevdiyi qadını özü seçmir, amma düşünürəm ki, mütləq ateist olmalıdır, realist olmalıdır, adrenalin tərəfdarı olmalıdır.
Məsəlçün bizdə xanımlar münasibətə başlar-başlamaz oğlanın onunla evlənib evlənməyəcəyinə diqqət edirlər. Buna münasibətim isə çox pisdir və bu tip xanımlarla münasibət qurmağa cəhd belə etmirəm, çünki bu tiplərlə çox çətin olur. Onlarla sekslə məşğul olmaqda mənasızdır, seksdə mozaxist qadınlara üstünlük verirəm (gülür).

-Gəl, bir az da siyasi fəaliyyətindən danışaq. Ailən siyasi aktivlik nümayiş etdirəndə buna etiraz edirdimi?

-Ailəm tərəfindən mənə dəfələrlə təzyiqlər olub, 18 yaşımda ailəmlə münasibətlərim çox mənfi bir hala gəlmişdi, aylarla münasibət belə saxlamadılar mənimlə. Siyasi proseslərdən uzaqlaşmağımı tələb edirdilər, amma müəyyən zaman sonra ailəm də mənimlə razılaşmalı oldu, bu fəaliyyətimdən heç bir halda uzaqlaşmayacağımı anlamışdılar və hazırda ailəm tərəfindən böyük mənəvi dəstək alıram, hətta babam və digər qohumlarım “facebook”-da siyasi statuslarımı bəyənir, rəy yazaraq öz dəstəyini ifadə edirlər.

-Aktiv gənc olmaq çətin deyil ki?

-Məncə bu insanın təbiətindən və marağından asılıdır, mən insanlarla daha tez ünsiyyət yaradıram. Bir insanın çevrəsinin geniş olması onun aktiv insan olması ilə əlaqədardır.

-Təbrizin virtual dünyası necədir, realdan çoxmu fərqlənir?

-Virtual dünya mənim real həyatımla sıx bir şəkildə sintez olunub, siyasi fəaliyyətimizə də böyük təsiri var, yazdıqlarımız, paylaşdığımız xəbərləri minlərlə insan görür və müəyyən hissəsi bizlərə qoşulmağa qərar verir, daha çox insan səni izləyə və dinləyə bilir, daha bir müsbət cəhəti də odur ki, sənə maraqlı olan amma realda tanımadığın insanı virtualda izləyə bilirsən. Maddi cəhətdən də sosial şəbəkələrin sayəsində tanışlarla, dostlarla əlaqə baxımından qənaət etmiş oluruq.

"İnsan öncə nə uğrunda mübarizə apardığını bilməlidir..."

-İndiyədək 3 siyasi partiya dəyişmişən, bu ölkədə siyasi partiyaların zəifliyinin göstəricisidir, yoxsa sənin axtardığının fərqli bir şey olması ilə əlaqədar?

-Ölkədə çox müxalif partiya var, bir çoxunun əsl mahiyyəti zatən hərkəsə bəllidir, amma bunların içində elə partiyalar var ki, onların necə fəaliyyət göstərdiyini daha yaxşı bilmək üçün həmin partiyaların tərkibində olmalısan. Doğrudur, 3 partiya dəyişmişəm. İlk dəfə AXCP sıralarına qoşulanda həmin partiyanı, partiyanın fəaliyyətini tamam fərqli yöndə təsəvvür edirdim. Onlar ifadə azadlığı, demokratiya uğrunda savaşan insanlar kimi cəmiyyətə bəllidir, lakin zamanla ordakı, bir çox üzvləri, partiya rəhbərliyini daha dərindən tanıdıqdan sonra anladım ki, bu partiya da diktator qaydalarla idarə olunur. Üzv olduqdan 1 il sonra AXCP Gənclər Komitəsinin Ali Məclis üzvü oldum, özək təşkilatında sədr və koordinator idim, bu hadisədən sonra onlar mənim fərqli fikir söyləməmə daha sərt cavab verirdilər, çünki “onlara görə” rəhbərlikdə təmsil olunanlar hər zaman komanda oyununda iştirak etməli idi, sədrin tapşırığını analiz etmədən yerinə yetirməli idi. Bu gün də vəziyyətləri dediyim kimidir, məndə bu insanların dediklərinə əməl etmədiklərini, demokratiya adından istifadə etdiklərini gördüm və oyunlarında oyunçu olmaq yerinə partiyadan istefa vermək qərarına gəldim. Fikrimcə, insan öncə nə uğrunda mübarizə apardığını bilməlidir.

Sonra isə Gələcək Azərbaycan Partiyasına üzv oldum və qısa zaman sonra Gənclər Təşkilatının seçkiləri zamanı gənclər tərəfindən təşkilatın sədri seçildim, Gənclər Təşkilatına yüzlərlə gənc cəlb etmişdim. GAP daxilində də bır sıra ciddi problemlər yaranmışdı, partiya rəhbərliyinə bir çox təkliflər versəmdə problemlərin öz həllini tapmadığını gördüm və bu səbəbdən 7 ay sonra yenə də istefa verməli oldum.

İstefa verdikdən sonra son olaraq Vətəndaş Həmrəyliyi Partiyasının rəhbərliyindən bir şəxslə görüşdüyüm zaman bu partiyaya üzv olmağım təklif olundu. Bu dəfə yenə yalnış qərar verməmək üçün partiyanın mövcüd strukturunu, fəaliyyətini və.s bir çox məsələləri nəzərə alaraq VHP-yə üzv olmağa və burda fəaliyyətimi davam etdirməyə qərar verdim, artıq xeyli zamandır ki, burdayam və yanılmadığımı düşünürəm.
Öz fəaliyyətimlə müqayisə apararsaq müxalifətin zəif, prespektivsiz olduğunu sübut etmək məncə kifayət edər. Mən sədr olduğum zaman çox çətin bir şəraitdə cəmi 7 aylıq fəaliyyətimlə minumum 100 gənci təşkilata cəlb edə bilmişdimsə, iclaslarımız da üzvlərin böyük əksəriyyətinin iştirakını təmin edə bilirdimsə, belə olan halda bu gün müxalif “liderlər” ətrafına 500 nəfər yığaraq xalqın adından danışırsa, buna fəaliyyət deyirlərsə, o zamam bu ölkə müxalifətinin fəaliyyətinə nisbətən 20 yaşlı bir gənc olaraq mənim fəaliyyətim çox yaxşı bir göstərici sayılır və mənim potensialımın, liderlik gücümün göstəricisi hesab edilməlidir.

-Səncə ölkədə müxalifət var, ya yox?

-Cavab olaraq hamı içində bir şeyi özünə deyəcək: «Nə müxalifət?!» Bu gün ölkədə kimsə müxalifət deyilən, «filana» inanmır. Fikrimcə ölkədə heç kim özünə belə inanmır. Heç kimin özünə inanmadığı bir ölkədə müxalifətin kimlərinsə hüquqlarını müdafiə etməsi, ya da buna can atması çox əcaibdir.

-Son olaraq nə demək istəyirsən?

-Son olaraq gənclərə demək istəyirəm ki, yalnız zəif və düşüncəsiz insanlar mentalitetə boyun əyir, müəyyən çərçivədə məhdudlaşırlar, yalnız onlar başqalarının yazdıqları ssenari ilə yaşayırlar, siz “onlardan” olmayın, istəklərinizin arxasınca qaçın, içki çox gözəldir, için, sevişin! Azadlığınızı məhdudlaşdıran istənilən gücə qarşı çıxın! Bir sözlə yaşamaq istədiyiniz həyat uğrunda mübarizə aparın, istədiyiniz kimi yaşamağa, azad olmağa çalışın!

Söhbətləşdi: Fatimə

Ölkə.Az