Akif Nağıdan deputata: "Kimliyindən asılı olmayaraq hər kəs bu cür sərsəm təkliflərdən çəkinməlidir"

"Kimlərsə gündəmdə qalmaq və ya beynəlxalq təşkilatların xoşuna gəlmək üçün ağlına gələn fikirləri səsləndirir"

"Son zamanlar bu mövzularda müxtəlif fikirlərə rast gəlirəm. Səslənən bu fikirlər isə çıxış yolu deyil. Kimlərsə gündəmdə qalmaq və ya beynəlxalq təşkilatların xoşuna gəlmək üçün ağlına gələn fikirləri səsləndirir. Bütün bunlar mənasız məsələdir".

Bu sözləri Ölkə.az-a QAT sədri Akif Nağı millət vəkili İqbal Ağazadənin ölkəmizə keçən Andranik Qriqoryana Azərbaycan pasportu verilməsi barədə səsləndirdiyi fikri şərh edərkən deyib.

"Torpaqlarımız işğaldan azad olunmalıdır, vəssalam. Bütün təşəbbüslər yalnız torpaqlar işğaldan azad edildikdən sonra ola bilər. Nə qədər ki, torpaqlarımız işğal altındadır bu cür təklifləri verənlər ermənilərin maraqlarına xidmət edəcəklər. Bu yanlız işğalın mahiyyətini yanlış təqdim etmək deməkdir.

Düşünürəm ki, bu mövqe milli maraqlara xidmət etmir. Kimliyindən asılı olmayaraq hər kəs bu cür sərsəm təkliflərdən çəkinməlidir".

Xatırladaq ki, millət vəkili İqbal Ağazadə Milli Məclisin bu gün keçirilən plenar iclasında ölkəmizə keçən Andranik Qriqoryana Azərbaycan pasportu verilməsi təklif etmişdir.

Ölkə.az