Azərbaycan Rusiya ilə əczaçılıq sahəsində əməkdaşlıq edəcək

Aprelin 7-də Bakıda Azərbaycan-Rusiya işgüzar görüşü keçirilib.

Bu barədə Ölkə.Az-a İqtisadiyyat və Sənaye Nazirliyindən məlumat verilib.

Görüşdə hər iki tərəfdən əczaçılıq sahəsində fəaliyyət göstərən 30-dan çox iş adamı iştirak edib.

Tədbirdə AZPROMO-nun rəhbəri Rüfət Məmmədov Azərbaycanın xarici investisiyalar üçün əlverişli və cəlbedici ölkə olduğunu vurğulayıb. Rüfət Məmmədov Rusiya və Azərbaycan arasında iqtisadi əlaqələrin daha da genişləndirilməsi üçün hər iki ölkənin böyük potensiala malik olduğunu qeyd edərək rusiyalı iş adamlarını fəal əməkdaşlığa dəvət edib.

Rusiya Federasiyasının sənaye və ticarət nazirinin müavini Sergey Tsıb Azərbaycana səfərindən məmnunluğunu bildirib, Azərbaycan iqtisadiyyatının sürətlə inkişaf etdiyini qeyd edib. Sergey Tsıb digər sahələrlə yanaşı əczaçılıq sahəsində əməkdaşlıq imkanlarına dair fikirlərini bölüşərək, ölkəsinin Azərbaycanla ikitərəfli əlaqələrin genişləndirilməsində maraqlı olduğunu vurğulayıb.

Sumqayıt Kimya Sənaye Parkının direktor müavini Zaur Məmmədov parkın fəaliyyəti, parkda investorlar üçün yaradılmış güzəşt mexanizmləri və xidmətlər barədə təqdimatla çıxış edib.

Görüşdə, hər iki ölkəni təmsil edən iş adamları öz fəaliyyətləri barədə məlumat verib, şirkətlər arasında əczaçılıq sahəsində əməkdaşlıq imkanlarına dair fikir mübadiləsi aparılıb.

Ölkə.Az