Hakimin azad etdiyi şəxsi DİN əməkdaşları buraxmadı

Azərbaycan hüquq-mühafizə sistemində görünməmiş hadisə baş verib. Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi məhkəmə tərəfindən həbsdən azad edilmiş şəxsi sərbəst buraxmaqdan imtina edib.

Ölkə.Az xəbər verir ki, bu barədə aznews.az-a həmin şəxsin vəkili Telman İbrahimov məlumat verib. Onun sözlərinə görə, müdafiə etdiyi Əliyev Emin Fərail oğlunun məhkəmə zalından azadlığa buraxılması barədə qərar qəbul edilib. Lakin ona müəyyən sənədlərə qol çəkdiriləcəyi deyilərək, təcili şəkildə məhkəmə zalından çıxarılıb və yenidən saxlanıldığı təcridxanaya aparılıb.

Qeyd edək ki, Əliyev Emin Fərail oğlu 24 mart 2015-ci il tarixində Cinayət Məcəlləsinin 178.3.2-ci maddəsi cinayət məsuliyyətinə cəlb edilib. O, tanıdığı şəxsin etibardan sui-istifadə etməkdə günahlandırılıb. İttihamlara əsasən, E. Əliyev Qurbanov İsa Sadəddin oğlu ilə əlbir olaraq Astara rayonu Ərçivan Bələdiyyəsinin sədri Rzayeva İradə Məmməd qızına bələdiyyənin mülkiyyətində olan və 2012-ci ildən istismarı dayandırılmış Ərçivan magistral qaz kəmərinin 530 mm-lik metal borularını almaq istədiyini bildirərək iş adamı kimi təqdim etdiyi İsa Qurbanovla müqavilə bağlamasını təklif edib. İradə Rzayeva ona inanıb razılıq verdikdən sonra İsa Qurbanov sonuncunun etibarını qazanmaq üçün direktoru olduğu “Dikdaş-İnşaat” MMC-nin adından Ərçivan bələdiyyəsi ilə polad boruların alğı-satqısına dair 5 dekabr 2014-cü il tarixdə formal müqavilə imzalayıb. O, aldığı boruların pulunu sonradan ödəyəcəyinə dair yalan vəd verib. Bununla da İradə Rzayevanı aldadaraq 23 yanvar 2015-ci il tarixdən 27 fevral 2015-ci il tarixə kimi olan müddət ərzində Astara rayonu, Ərçivan qəsəbəsində bələdiyyənin mülkiyyətində olan 10692 manat dəyərində 1.188 metr 530 mm-lik polad boruları ələ keçirib və satıb. Pulunu isə Emin Əliyevlə aralarında bölüb.

Nərimanov rayon məhkəməsinin 24 mart 2015-ci il tarixli qərarı ilə Əliyev Emin Fərail oğlu 4 ay müddətinə həbs olunub.

Vəkilin sözlərinə görə, məhkəmə qərarına əsasən Əliyev Emin Azərbaycan Respublikası Ədliyyə Nazirliyinin Penitensiar Xidmətinin Bakı İstintaq Təcridxanasında saxlanılmalıymış. “Vəkili olduğum Emin Əliyev Bakı İstintaq Təcridxanasına köçürülməli olduğu halda köçürülmür və DİN-nin BMCMİ-də saxlanılır. Emin Əliyevlə 30, 31 mart və 1 aprel 2015-ci il tarixlərdə görüşmək istəsəm də, idarənin giriş qapısında mühafizəni həyata keçirən polis təcridxanaya yalnız idarə rəisinin razılığı ilə keçə biləcəyimi, idarə rəisinin isə işdə olmadığını bəhanə edərək hüquqi xidmət göstərdiyim şəxslə görüşməyimə icazə vermədi. 2 aprel tarixində DİN-nin 102 xidmətinə şikayətimi bildirdikdən sonra Emin Əliyevlə görüşümə icazə verildi”.

Əliyev Emin barəsində Nərimanov Rayon Məhkəməsinin çıxardığı qərardan apellyasiya şikayəti verib. 06 aprel 2015-ci ildə keçirilən Məhkəmə prosesində hakim təqsirləndirilən şəxsin həbsi üçün kifayət qədər dəlil və sübutlar olmadığından şikayəti təmin edib və onun məhkəmə zalından dərhal azadlığa çıxarılması barədə qərar verib: “Əliyev Emin Fərail oğlunun dərhal məhkəmə zalından həbsdən azad edilməsi barədə qərar qəbul edildi. Lakin DİN BMCMİ məhkəmənin qərarını icra etməkdən boyun qaçırdı. Bizə dedilər ki, bəzi sənədlər var, ona qol çəkilməlidir, əşyalar verilməlidir. Qollarını qandallayıb apardılar. Müvəkkilim hazırda DİN BMCMİ-nin müvəqqəti saxlama təcridxanasında saxlanılır. Emin Əliyevin inzibati qaydada həbs edilmə qərarının və barəsində həbs qətimkan tədbiri seçilmə qərarının və həbsdən azad edilmə qərarlarının icra edilməməsində DİN BMCMİ-nin rəhbər vəzifəli şəxslərinin əməl və hərəkətlərində Cinayət Məcəlləsinin 308-cii və 306.2-ci maddəsi ilə cinayət hesab edilən əməlin əlamətləri və tərkibi var. Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin İstintaq Şöbəsinin baş müstəntiqi Quliyev Murad Emin Əliyevi qanunsuz və əsassız olaraq cinayət məsuliyyətinə cəlb edib, qanunsuz olaraq həbs edib”.

Telman İbrahimov Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin İstintaq Şöbəsinin baş müstəntiqinin qanunsuz hərəkətlərindən daha yuxarı instansiyalara müraciət hazırladığını deyir.

Ölkə.Az