"Dini mütəxəssislərin hazırlanmasında yerli universitetlərin rolunun artırılması müsbət nəticələr verə bilər"

"Xarici ölkələrdə təhsil alanların düşüncələrinə istər-istəməz bu ölkələrin təsiri də hopur"

"Azərbaycanda dini təhsil verən iki qurum var. Bunlardan biri Bakı İslam Universiteti, digəri isə BDU-nun ilahiyyat fakültəsidir. Bakı İslam Universiteti Qafqaz Müsəlmanları İdarəsinin təsisçiliyi ilə fəaliyyət göstərir. Artıq bir neçə ildir bu universitet Təhsil Nazirliyinin lisenziyasını alıb. Dünyanın ənənəvi İslam universitetləri ilə müqayisə etdikdə, bu təhsil müəssisəsinin maddi-texniki bazası və təhsilin keyfiyyəti o qədər yüksək səviyyədə qurulmayıb".

Bu sözləri Ölkə.Az-a danışan araşdırmaçı jurnalist Rəsul Mirhəşimli deyib.

"BDU-nun ilahiyyat fakültəsi bu universitetlə müqayisədə daha peşəkar mütəxəssislər hazırlayır. Bu gün Azərbaycanda tanınan ilahiyyatçıların bir çoxu məhz bu fakültənin yetirmələridir. Bir zamanlar bu fakültə Türkiyənin ilahiyyat təhsili verən universitetləri ilə əməkdaşlıq edirdi. Dini ənənələri olan bir ölkə ilə əməkdaşlıq bu fakültənin peşəkar kadrlar hazırlanmasında müsbət rol oynayırdı.
Hesab edirəm ki, dini mütəxəssislərin hazırlanmasında yerli universitetlərin rolunun artırılması daha mübət nəticələr verə bilər. Xarici ölkələrdə təhsil alanların düşüncələrinə istər-istəməz bu ölkələrin təsiri də hopur. Bizim üçün əsas cəhət isə milli və dini kimliyini bir arada tuta bilən kadrların hazırlanması daha məqsədəuyğundur".

Fatimə

Ölkə.Az