"Kişi ac qalanda qadınını yeyə bilər" xəbəri iranyönümlü ANS-in uydurmasıdır
Səudiyyə Ərəbistanı müftisi Əbdüləziz Əli Şeyxin "əgər kişi ölümcül həddə qədər aclığa düçar olsa və yeməyə heç nə tapmasa öz qadınının bir hissəsini və ya bütün bədənini kəsib yeyə bilər" şəklində fətva verməsi xəbərləri yayılmağa başladı.
Ancaq sonradan məlum oldu ki, Səudiyyə Ərəbistanı müftiliyinin rəsmi saytında bu haqda bir cümlə də olsun yazılmayıb. Halbuki Səudiyyə Ərəbistanı müftisinin verdiyi bütün fətvalar ilk öncə müftiliyin saytında yerləşdirilir.
Bu xəbərin dəqiqliyini, hansı niyyətlə yayılmasını ilahiyyatçı alim Elşad Miri Ölkə.Az-a şərh etdi:
"Bu xəbər çıxan kimi dərhal müftiliyin saytına baxdım. Bu mövzu ilə əlaqədar orada nə bir sual var, nə də ki bir fətva var. Sonrakı araşdırmamızın nəticəsində gördük ki, bu xəbər İran yönümlü, İrandakı mövcud olan məzhəbi əsas götürən saytlar tərəfindən yayılıb. Bu xəbərlər şər, böhtan xarakterilidir. Azərbaycanda bu işlə məşğul olan saytlar prezidentin Səudiyyə Ərəbistanına səfər etdiyi ərəfədə yayması düşündürücüdür.
Xatırlayırsınızsa Allahşükür Paşazadən Səudiyyə Ərəbistanını Yəmən məsələsinə görə ittiham etmişdi və bundan sonra Xarici İşlər Nazirliyi bu açıqlamaya şərh verərək şeyxin açıqlamasının dövlətin mövqeyi olmadığını bildirdi. Bütün bunlardan sonra şiə yönümlü KİV-lər bu xəbəri yaymağa başladı.
Bu məlumatları daha çox "ANS" telekanalı və "anspress.com" saytı yayıb. "ANS" telekanalı və onun saytı İranda akkreditə olunmuş yegənə mediamızdır. Onlar da İranın əlehinə heç bir informasiya vermirlər. Ekrana dəvət etdikləri ilahiyatçılar da hamısı da demək olar ki, iranyönümlü olur və onlar da həmişə Səudiyyə Ərəbistanının əlehinə danışırlar. Ayrı vaxt, dəqiq, qərəzsiz, vicdanlı deyilən bir kanalın, saytın bu cür qərəzli mövqe tutması sadəcə təxribat xarakteri olduğunu düşünürəm. Bu ölkədə olan tolerantlığa zərərverici bir fəaliyyət olduğu qənaətinə gəlmək olar.
Belə bir şeylərin yayımlanması ən azından ayıbdır, etikadan kənardı.
Bu günə qədər şəxsən mənim özümə dinlə bağlı minlərlə suallar gəlib. Amma heç vaxt belə bir sual gəlməyib ki, mən arvadımı yemək istəyirəm, ərimi yemək istəyirəm. Bu çox gülünc bir şeydir", -deyə Elşad Miri bildirib.
Qeyd edək ki, yuxarıda adıçəkilən bütün şəxs və qurumların mövqeyini dərc etməyə hazırıaq.
Səxavət Məmməd
Ölkə.Az
