ATV-dəki ixtisarlarla bağlı rəsmi açıqlama

 "10 aprel 2015 ci il, səhər saatlarından başlayaraq şirkətimizin elektron unvanlarına müxtəlif mənbələrdən yerli saytlara istinadən yayılmış xəbərlə bağlı suallar daxil olur. Məsələ ilə bağlı məlumatı yayan saytlardakı həmkarlarımızın istinad etdiyi mənbəyə müraciət etməyi məsləhət bilirik. Əgər “mənbə”nin məlumatı əldə olunduqdan sonra saytlar informasiyanı dəqiqləşdirmək üçün ATV-yə müraciət etmədən bu xəbəri dərc edibsə, bu məlumatın dəqiqləşdirilməsi məsuliyyəti də sözügedən mənbənin və saytların uzərinə düşür".

Bu fikirləri Ölkə.Az-a açıqlamasında ATV telekanalının xəbərlər departamentinin baş redaktoru VAqif Aydınoğlu işlədiyi qurumda ixtisarların olmasıyla bağlı yayılan xəbərlər münasibət bildirərkən səsləndirib. V. Aydınoğlu bildirib ki, sözügedən informasiyanın heç bir əsası yoxdur:

"Öz növbəmizdə isə həmkarlarımızı dəqiqləşdirilməmiş məlumatları yerləşdirmədən öncə qanunvericiliyin normalarını və fəaliyyətdə olan bu və ya digər təşkilatın ictimai nüfuzuna vura biləcəkləri zərbənin nəticələrini nəzərə almağa çağırırıq. Bir daha diqqətnizə çatdırırıq ki, bilərəkdən şişirdilmiş formada yayılmış bu informasiyanın heç bir əsası yoxdur".

Qeyd edək ki, azxeber.com saytı telekanaldan kütləvi ixtisarların olmasıyla bağlı xəbər yaymışdı. Bildirilirdi ki, ixtisara düşənlərin əksəriyyəti xanım əməkdaşlardır:

"Onları kadrlar şöbəsinə çağırılaraq təkidlə ərizə yazmalı olduqları deyilib. İşdən çıxarılanların bir çoxu əmək məcəlləsinin kobud şəkildə pozulduğunu iddia edərək ərizə yazmaqdan imtina ediblər. Bununla yanaşı kanalın İstanbul və Moskva nümayəndəliyi ləğv edilib və oradakı müxbirlərin işinə xitam verilib".

İntiqam VALEHOĞLU
Ölkə.Az