Psixoloq: "20-21 yaşlı qadının ana olması zamanla onun erkən yaşlanmasına səbəb olur"
"Erkən evliliklərin qarşısını almaq üçün ilk olaraq vicdan lazımdır. Bu cür evliliklərin xanımların orqanizminə nə qədər ziyan olması barədə maarifləndirici tədbirlər keçirilməlidir. 20-21 yaşlı qadının 2 uşaqlı ana olması zamanla onun erkən yaşlanmasına səbəb olur. Və həyat ona yorucu gəlir".
Bu sözləri Ölkə.Az-a danışan psixoloq Narınc Rüstəmova erkən evlilikləri şərh edərkən deyib.
"Cinsi istək, qarşı tərəfdən xoş söz eşitmək istəyi evliliyə hazırlıq demək deyil. İnsanlar bu hisləri qarışdırmamalıdır. Bəzən qızların yetişkənlik dönəmini onları evliliyə hazır olmaları kimi qiymətləndirirlər ki, bu yanaşma kökündən yanlışdır. Unutmaq lazım deyil ki, o ailə yükü daşıyacaq, bir övlad tərbiyə edəcək. Və erkən evliliklər bir uşağın buna məcbur edilməsi deməkdir. Azyaşlı insanlar çox vaxt öz məsuliyyətini dərk etmir. Onların ailə məsuliyyəti altına girməsi düzgün deyil".
Psixoloq erkən evliliklərdə serialların rolundan da danışdı.
"Erkən evliliklərdə serialların da çox böyük rolu var. Evlilik, ailə həyatı qurmadan da uşaq dünyaya gətirmək artıq adiləşib. Artıq yaşından tez uşaqlar bu gün onların bilməsi lazım olmayan informasiyalara sahibdirlər. Bu azyaşlıları erkən yetişkənlik dövrünə salır. Sırf bu səbəbdən 9 yaşlı uşaqlar cinsəlliklə rastlaşırlar.
Bu gün artıq 6-7 yaşlı uşaqlar onların yaşlarına uyğun olmayan informasiyalarla maraqlanır, maraq göstərirlər. Bu isə qorxuludur.
Hormonal yetişkənlik gənclərdə sırf evlənmək istəyi yaradır, tək məqsəd "böyüyüm, evlənim" olur. Bu isə gənclərin inkişafına mane olur.
Təəssüf olsun ki, cəmiyyətimizdə ailə haqqında yanlış münasibətlər mövcuddur".
Ölkə.Az
