1 yaşlı Avtosfer.az-ın rəhbəri: "Statistikanı açıqlamaqla yol polisinin işi bitmiş sayılmamalıdır"

Polisin üstünə maşın sürən, söyən, hətta üstünə benzin töküb yandıran sürücülər var.

Bu gün Avtosfer.az saytının fəaliyyətə başlamasından bir il ötür. Düzdür, saytın daimi oxucu olmasam da, maraqlı xəbərlərinə, yayımladığı eksklüziv videolarına da laqeyd deyiləm. Nəzərə alsaq ki, bizdə bu sahədə boşluq var, səbəbkarın fəaliyyətini yetərincə qənaətbəxş saymaq olar. Beləliklə, Ölkə.Az-ın suallarını saytın baş redaktoru, həmkarımız Elməddin Muradlı cavablandırır.

- Elməddin, Avtosfer.az saytı hansı ideyadan yarandı?

- Bu layihə Prezident Yanında Qeyri-Hökumət Təşkilatlarına Dövlət Dəstəyi Şurası tərəfindən dəstəkləndi. Amma yol hərəkəti qaydalarıyla bağlı maarifləndirici sayt açmaq arzumuz var idi. Çünki ictimai nəqliyyatdan istifadə edən hər kəs görür ki, bu sahədə nə qədər problemlər var. Sərnişinlərdən tutmuş sərnişindaşımaya, yol polisindən, yol nişanlarına qədər böyük problemlər mövcuddur. Bunların həlli bir günün, bir ayın, hətta bir ilin içində mümkün deyil. Hər şey tədricən yoluna qoyulmalıdır. Çünki bizim mental xüsusiyyətlərimiz var. Adicə metroda davranış qaydalarını bilmirik. Bakıya yeni avtobuslar gətirilir, bir həftədən sonra oturacaqlarını qələmlə yazırlar.

- Səncə, bu bir il ərzində nəsə alındı?

- Çalışdıq ki, həm sürücülərin, həm piyadaların, həm də sərnişinlərin maarifləndirilməsi sahəsində müəyyən işlər görək. Deyə bilmərik ki, hamı bizi bəyəndi. Təbii ki, müəyyən vaxtlarda yol polisi də, bəzi sürücülər də bizdən narazı qaldı. Çünki həmin sürücülərin avtoxuliqanlıq videolarını yaydıq, polis onları həbs elədi.

- Yəqin ki təzyiqlər olurdu...

- Əlbəttə, təzyiqlər də oldu, sayta haker hücumları da təşkil edildi. Sonradan məlum oldu ki, bu hücumu böyük pullar hesabına təşkil etdiriblər. Baxırsan ki, o pulla hansısa savab iş görmək olardı. Saytımız iki həftə işləmədi. Bu yaxınlarda sayta yenidən haker hücumu olmuşdu. Mənim fotomu eybəcər formaya salıb əsas səhifəyə qoymuşdular. Guya bununla nəsə əldə etdilər.

- Saytın gündəlik oxucusu nə qədərdi?

- Gündəlik real İP 15 mindən aşağı deyil. Yəni, ümumilikdə 60-70 min adam bu saytı izləyir.

- Hazırda əksər saytlarda maliyyə problemi var. Avtosfer.az-da vəziyyət necədir?

- Həmkarlarımız, həvəskarlar sağ olsunlar, təmənnasız kömək ediblər. Bu saytı mən və hüquqşünas dostum Ərşad Hüseynov idarə etmişik. Onun da çox böyük dəstəyi olub. Ötən ilin aprel, may, iyun, iyul aylarında nəzərdə tutulan maliyyə vəsaiti xərclənib və layihənin hesabatı da verilib. Şura hesabatımızı yüksək qiymətləndirib. Ondan sonra hər şeyi dişimiz, dırnağımızla etmişik. Reklamımız yoxdur. Çox çalışdım ki, reklam tapım və bu qənaətə gəldim ki, reklam almaq üçün də tanış, tapşırıq lazımdır. Kimə deyirsən, hamı söz verir, ortada real iş yoxdur. Həmin şirkət elə mənasız saytlara reklam verir ki... Onda məlum olur ki, saytın gündəlik girişi önəmli deyil. Bu sahədə inhisarçılıq var.

- Ofisiniz var?

- Saytın ofisi yoxdur. Ərşad Hüseynovun hüquq firmasını ofisindən istifadə edirik.

- Yaxın gələcəkdə saytla bağlı hansı planlar var?

- Saytın dizaynını yeniləmək istəyirik. Çünki texnologiyalar inkişaf etdikcə müəyyən məsələlər ortaya çıxır. Görürsən ki, sürücülər sual verir və onun cavabını tez istəyir. Məqsədimiz həm sürücülərə, həm də yol polislərinə kömək etməkdir. Buna görə növbəti layihəmiz yol polisi-sürücü münasibətlərinə həsr olunub. İstəyirik ki, yol polisi ilə sürücülər arasındakı gərginliyin azaldılması istiqamətində müəyyən işlər görək. Siz də görürsünüz ki, axır vaxtlar yol polisin üstünə maşın sürən, söyən, hətta üstünə benzin töküb yandıran sürücülər var. Bu sahədə təbliğat işi aparılmalıdır. Ayda bir dəfə çıxıb statistik rəqəmləri açıqlamaqla yol polisinin işini bitmiş saymaq olmaz. Çıxıb rəqəmləri elan etmək iş deyil. İnsanlar soruşurlar ki, bu mənfi statistikanın azalması üçün hansı işi görmüsən?

- Və son olaraq. Saytın ilk yaşını qeyd edəcəksinizmi?

- Bizim Ramil Osmanlı Ərşad Hüseynov kimi etibarlı dostlarımız var. Yol polisinin ictimaiyyətlə əlaqələr şöbələri ilə də münasibətlərimiz yaxşıdır. Dar çərçivədə də olsa, bir yaşımızı qeyd etməyi düşünürük. Baxma da, bir yaşımızdır. Uşağın da bir yaşını qeyd etməyəndə adamdan küsür. Sayt bizdən küsməsin deyə, nəsə edəcəyik (gülür).

İntiqam VALEHOĞLU

Ölkə.Az