Bakının mərkəzində aksiya olacaq

Azərbaycan Avropa Hərəkatı (AAH) 21 aprel saat 15:00-da Bakının fəvvarələr bağında dinc aksiya keçirəcək.

Aksiya ermənilərin 1915-ci ildə baş vermiş hadisələri “erməni soyqırımı” adı ilə dünya ictimaiyyətinə təqdim etməsi və 24 apreldə hadisələrin yüz illiyi olduğu üçün daha genişmiqyaslı təşviqata başlaması ilə bağlıdır.

Hərəkatın mətbuat xidmətindən verilən məlumata görə “soyqırım iddiası düşmənçilik yaradır!” şüarı ilə keçiriləcək açıq hava brifinqi düyaya sülh çağırışı məqsədi güdür: “Azərbaycan Avropa Hərəkatı (AAH) öz prinsiplərini bütün xalqların milli maraqlarını özündə birləşdirən ümumbəşəri dəyərlər əsasında formalaşdırıb. Bu səbəbdəndir ki, biz sülhün bərqərar olması üçün aktiv fəaliyyət göstərməkdəyik. Beynəlxalq Avropa Hərəkatının Azərbaycan nümayəndəliyi olaraq “Ermənistan–Azərbaycan Dağlıq Qarabağ münaqişəsi”nin barış yolu ilə tənzimlənməsi üçün həyata keçirilən layihələrin fəal tərəfdaşıyıq. Münaqişə nəticəsində ayrı düşən xalqların yaxınlaşması məqsədi ilə hərəkatımızın nümayəndələri bütün riskləri gözə alaraq Ermənistanda səfərdə olub və sülh çağırışı edib. Hərəkatımız ermənilərin, türkiyəlilərin, gürcülərin, azərbaycanlıların bir araya gəldiyi tədbirlər, görüşlər, layihələr edir.
Təəssüflə qeyd etmək istərdik ki, tarixi prosesləri siyasi ritorikaya daşıyan qüvvələr həyata keçirmək istədiyimiz barış prosesinə əngəl törədir. Əgər birinci dünya savaşı zamanı baş verənləri soyqırım kimi xarakterizə etsək, erməni xalqına qisasçılıq hissi aşılamış olarıq. Bu halda da regionda sabitlik mümkün olmayacaq. Eyni zamanda soyqırım iddiası düşmənçilik yaradır, Ermənistan-Türkiyə sərhədlərinin bağlı qalmasına xidmət edir, münaqişədə maraqlı olan tərəflərin lehinə işləyir.”.
Hərəkat sülhsevər insanları, barış naminə birləşməyə, tarixi hadisələrə deyil, gələcəyə istiqamətlənən mesajlar verməyə, insanlığın təntənəsi üçün dialoq istiqamətində fəaliyyətləri daha da genişləndirməyə çağırırıq və hər kəsi 21 aprel saat 15:00-da Bakının fəvvarələr bağında baş tutacaq dinc aksiyaya dəvət edir.

Ölkə.Az